东方不亮「西」方亮

2017-10-12 18:06:40 来源:互联网

photo_742526.jpg
队队都想击败勇士呢支卫冕冠军。 经过呢个夏天交易市场嘅多宗大手笔交易,如今NBA西强东弱愈发明显,唔似东岸咁就得两支球队实力较为突出,估计西岸今季嘅季后赛资格争夺战都会争到头破血流,勇士一哥嘅位置恐怕亦会被撼动。正所谓东邪西毒,如今嘅西岸睇上去真系好「毒」。

细数历年总冠军,佢哋大多数都会喺新球季保留原有班底,勇士今季嘅变动唔系好大,球队依然保留四巨头嘅核心阵容,上季牺牲唔少数据嘅史提芬居里唔知会唔会为咗MVP抢返个大佬位嚟做咧?不过都要问过杜兰特先得。勇士嘅团体篮球呢几年打到风生水起,全靠史提夫卡尔呢位冠军级嘅教头,宜家队中人人都可以为咗赢波不惜牺牲自己。不过今夏有个操作就令人谂唔明,罗致历克杨格呢位「独」瘤,随时好事变坏事。

见到勇士呢班波,肯定好多球队会眼红佢哋嘅阵容既豪华又有深度,导致其他球队亦纷纷通过补强嚟冲击总冠军。喺今夏嘅交易市场,大手笔交易真系一浪接一浪,令人惊讶嘅又有,令人惊喜嘅都有,经过一连串嘅动作之后,东岸嘅多股力量已经齐齐过档至西岸。占美毕拿安东尼P.佐治等全明星球员纷纷转到西岸,其中最近几年都通过交易嚟希望重返巅峰嘅木狼最为引人关注,组成迪治占美毕拿安祖域坚斯同埋卡尔唐斯嘅豪华阵容,睇嚟唔单只系想冲击季后赛,甚至想推翻勇士西岸嘅霸主地位。

上季嘅雷霆凭藉韦斯博克一人就可以杀入季后赛,今季喺佢身边仲增添咗两大全明星,上季眼见「叛徒」杜兰特捧杯捧得咁开心,韦少今季都唔执输,连同安东尼P.佐治组成三巨头,雷霆今季绝对有能力叫板勇士。另外,火箭今夏亦再度提速,夏登可以将组织进攻嘅重责交畀基斯保罗呢位超级控卫,三分依然系火箭嘅杀著,迪安东尼嘅快打战术版图变得更为完整。马刺引入咗鲁迪基尔,呢个引援无疑丰富咗普波域治嘅战术打法,要内线有内线,要侧翼有侧翼,要控制节奏又有柏加,如今马刺五个位置上嘅实力都相当均衡,西岸嘅搅局者肯定唔会少咗佢哋。快艇虽然流失咗基斯保罗呢条大腿,不过修修补补之后,呢条艇嘅摩打好似换咗新机油咁,迪奥杜锡呢位喺欧洲赛场成名已久嘅控卫正式登陆NBA,不过能否适应节奏仲有待观察,加连拿利嘅加盟就真系彻底加强咗实力,呢位锋线万金油打内线又得,打外围又得,不过迪安祖佐敦B.基芬冇咗基斯保罗嘅餵波唔知仲飞唔飞得。

冇咗G.夏禾特嘅爵士可谓系西岸最悲催嘅队伍之一,其他位置虽然保留原班人马,仲引入前欧洲金童历奇卢比奥,但一支球队冇咗灵魂,就犹如死尸。湖人依然处于后高比时代,球队今夏悉数引入不少强援,但佢哋好似想围绕今年嘅榜眼朗素波尔嚟建队,呢位后生仔可能要交下学费先会成长。太阳同帝王属于重建中嘅队伍,不过迪云布加呢位即将年满21岁嘅新星就真系值得期待,但值得关注嘅亦只有佢。

灰熊、拓荒者、鹈鹕以及小牛呢几支球队正处于唔上唔落嘅位置,如果将佢哋摆系东岸,杀入季后赛犹如食生菜,不过系宜家威风八面嘅西岸,呢类只有双巨头或者单核心嘅球队最多就系冲击下季后赛资格,佢哋想要超越勇士、马刺、火箭呢啲劲旅仲系未够班。总体嚟讲,西岸嘅竞争真系愈嚟愈大,无论边队一旦出现主将受伤要长抖就好容易失去竞争力,究竟边队可以突破重围,我哋拭目以待!

论坛精华