2017互揭世盃瘡疤 大哨神回卻奧斯

2017-01-03 14:09:18 来源:互联网

2017互揭世盃瘡疤 大哨神回卻奧斯
 
網絡抽水成風,球員派吓膠或者講錯嘢都可能俾人洗足幾日版;效力皇家馬德里嘅德國中場卻奧斯諗住趁新年抽水,藉迎接2017年為名,用德國喺2014世盃四強7:1血洗巴西嘅戰果嚟抽水,結果引起唔少巴西兵同球迷反擊,連名宿「大哨」朗拿度都用巴西2002世盃決賽2:0擊敗德國嚟還擊,搞到卻奧斯笠水道歉。
 
大家開開心心歡度除夕,本來卻奧斯喺除夕夜上載「Feliz2017」(開心2017)嘅圖片都係同球迷問好,但佢就別有用心咁用上巴西國旗代替1字、德國國旗代替7字,明眼人都知佢搵番兩年幾前世盃四強德國作客7:1大炒巴西嚟抽水。
從呃like角度嚟睇,卻奧斯就真係贏咗,因為佢個post引發20萬次分享,不過就換嚟大量巴西球迷反擊,連皇馬隊友、巴西後衞馬些路都睇唔過眼,留言暗寸卻奧斯:「祝大家新年快樂,身體健康,同時要尊重別人。」連唔關事嘅皇馬哥倫比亞中場占士洛迪古斯都話卻奧斯玩大咗,要尊重對手咁話。
淨係鬧就冇咩用,以抽水還擊抽水就最有效,「大哨」朗拿度就真係頭腦靈活,好快就同樣上載「Feliz2017」圖片,不過今次就用巴西國旗代表2字,德國國旗代表0字,連埋佢自己一張踢波相;大家睇波衫就知道係02世盃決賽朗拿度梅開二度,幫巴西以2:0擊敗德國,第五度捧走世盃嘅場面啦。當年卻奧斯仲係12歲小朋友,冇份參與呢場大戰,但對德國老一批國腳好似簡尼、高路斯等,都真係創傷嚟㗎。
得罪巴粉卻奧斯耍冧
一日之後,卻奧斯知道自己玩大咗就留言道歉,話呢個只係小玩笑,希望大家開心同平安過新年。不過,睇嚟佢已經成為巴西球迷眼中釘,之後一旦要對巴西就小心啲嘞。
 

流言情报