拜林被騎士無限期禁賽

2013-12-30 09:33:27 来源:互联网

拜林被騎士無限期禁賽

今季加盟騎士嘅中鋒拜林,上周六被球會無限期禁賽,有知情人士話其實拜林已經冇心打波,呢種態度成為更衣室內一種負面影響,所以先令球會狠心停佢賽,仲可能喺1月送走佢。騎士同日作客以100:103不敵塞爾特人,主力K艾榮都話今次好大鑊。

K艾榮:內部好大問題
騎士上周六作客塞爾特人,攻入全場最高32分嘅K艾榮,賽前回應拜林遭禁賽一事:「今次球隊內部發生好大問題,我哋一定要上下一心跨過呢個難關。」聽佢咁講,睇嚟拜林被停賽唔係佢唔想打波咁簡單。今次禁賽事件亦令到教練米克布朗,好擔心班球員會受到影響:「我都擔心班球員,不過食呢一行飯,一個球季可以有好大上落,所以作為教頭,我可以做嘅事就係向前看。喺呢種時間裹足不前的話,只係浪費時間。」

拜林上季喺76人唞足一季,仲要不時走去打保齡,一啲都唔錫住個膝頭哥,引嚟不少抨擊,最後76人唔同佢續約。騎士同當時成為自由身嘅佢,簽下兩年2,480萬美元(約1.9億港元)嘅合約,不過只有600萬美元係受保障薪金。現年26歲嘅佢早前講過幾次,話因為兩個膝蓋都做過手術,機動力已經大減,而且兩個膝頭不時都會痛,搞到唔想練波又唔想比賽。米克布朗就否認拜林已經失去對籃球嘅熱誠。以目前呢個形勢,騎士好有可能喺1月7日合約變成受保障之前,透過交易送走佢或者裁走佢。睇個款,拜林執定包袱都得。
 

流言情报