美國主場高奏「海」歌

2015-07-10 07:12:07 来源:互联网

美國主場高奏「海」歌 

美洲金盃話咁快打到第二輪分組賽,大熱門美國喺A組基本上冇對手,雖然上一場係贏得辛苦,但總算搞掂同組最勁嘅洪都拉斯,嚟緊兩場分別打海地及巴拿馬,絕對又係睇定嚟食。呢場先打海地睇嚟奇連士文都唔會留手,因為要留力走線都要贏埋呢場至得,所以呢場就算讓幾多都冇所謂,睇好美國大勝一場。(周五5,香港時間周六8:30am開賽)

海地要打外圍賽至入到嚟最後12強,就已經知道佢哋實力同美國相距幾遠,而不過事實上,佢哋上一場表現係令人驚喜,因為巴拿馬喺國際賽經驗上絕對比佢哋優勝,最後海地迫和對方1:1,某程度上真係超水準演出,睇番佢哋陣容,前中後三線都有球員效力法乙球會,後衛哥力斯效力俄超羅斯托夫,似乎呢個國家近年足運發展不俗,當然現階段要追上幾支傳統中北美洲球隊不可能,但今戰都未必可以輸得好好睇睇。

主辦國有地利

美國上一戰表現令人極之失望,因為佢哋既係主辦國,又係大熱門身份,唔少人對佢哋抱有更大期望,不過自當路雲、謝明鍾斯等冇入選下,呢支新一代美軍級數上似乎不及上一輩,當中上場打洪都拉斯,左路薩迪斯、前線艾迪度尼、門將巴特古辛等,表現都可以用不知所謂嚟形容。上場之所以贏到洪都拉斯,都真係靠丹普西喺前線把握兩次黃金機會,但丹爺始終都係老將,上場打到70分鐘過後明顯腳軟,美國喺最後20分鐘完全冇還手之力,咁嘅表現打分組賽可以,但如果撞上墨西哥之流,恐怕都真係多多唔夠輸。

毋須留力走線

而事實上,既然上場打得一般,今場奇連士文又因應對手太弱,都可能作出變陣,當中艾朗祖漢臣、蘇斯等可能出任正選,而艾迪度尼都係時候自己檢討吓,預期C組墨西哥點打都會首名出線下,美國都冇咩實際走線必要,今場應該全力撲殺對手,睇嚟贏3球以上冇大問題。

流言情报