曼聯讓主一素頹風

2013-12-07 05:54:33 来源:互联网

曼聯讓主一素頹風

係呢場喇!如果你周中快車買曼聯損手,今晚就係時候買番佢哋主場砌低紐卡素作為補償,畢竟紅魔鬼班底有保證,就算冇咗停賽嘅朗尼,留守主場慳番咁多體力,「讓主」都理應照開!(周六15,now621台周六8:45pm直播)

曼聯周中又製造醜陋賽果,近21年嚟首次喺奧脫福輸俾愛華頓,最甚者係朗尼累積夠黃牌而要停賽,鑑於尹佩斯傷勢未明,領隊莫耶斯勢必要用韋碧克夥拍查維亞靴南迪斯攻堅,不過考慮到小豆每次出場都唔會令人失望,加上莫帥開始唔再拗頸,肯用番香川真司做派牌,是役留守主場免卻舟車勞頓之苦,發揮正常應可反底。
 

菲爾鍾斯復出救亡
喺8日內踢兩場嘅傑斯明顯體力急降,可以預期今晚唔會再見到呢位40歲老將落場,好在菲爾鍾斯坐完波監,是役可以取替劣評如潮嘅費蘭尼打防守中場,加上英格蘭國腳湯卡華利周中僅列作後備,新星贊奴沙同埋拿尼亦只係上陣咗三份一嘅時間,留有一手似乎係為咗今戰鋪路。
 

喜鵲眾法國幫回落
森林木唔睇好紐卡素嘅原因仲包括「喜鵲」自己都唔多掂,佢哋周中對住今季大跌Watt嘅史雲斯慘敗0:3,右閘迪保治仲擺埋烏龍,而且高路仙尼復出後明顯缺態,由佢夥拍質素平平嘅米克威廉臣打雙中堅好難俾到人信心。早前大勇嘅法國射手雷米近期有回落之勢,踏入12月之後仲未入波,連帶同胞卡比耶有沉寂咗落嚟,紐卡素想趁火打劫似乎未夠班,作客形勢極危。
翻查對賽往績,喜鵲過去造訪奧脫福多數都失手就擒,單計近6次都輸咗4場,最慘烈嗰次直情大敗0:6,無論係英超定係盃賽都冇乜好下場,上屆兩遇紅魔鬼無論作客定喺自己地頭作賽都輸晒,格食格味道好濃烈,適逢曼聯急需一場勝仗去重拾士氣兼同球迷以及捧場客交代,今晚讓球主客和唔捧曼聯開「讓主」就笨喇!

流言情报
相关标签: 曼联 纽卡素