摩連奴下搏殺令 車仔讓和喜諾洋洋

2013-10-06 06:52:25 来源:互联网

摩連奴下搏殺令 車仔讓和喜諾洋洋


摩連奴賽前話,希望球員好似佢一樣,當球隊輸波嗰陣會覺得心痛,得架喇!收到晒啦!車路士今晚作客諾域治,實會執行指令攞晒3分,仲會遵守埋狂人嘅小勝格言,贏一粒開「讓和」。(周日20,now621台周日8:30pm直播)

諾域治最近嘅戰績只係麻麻,剛過去嘅9月份只係贏過史篤城,仲要係1:0咁大把,另外就連負阿士東維拉同埋熱刺,聯賽盃同屈福特過招亦打成平手,搞到要踢埋加時先至晉級,最政命係主場出擊冇優勢,開咧至今喺卡羅路球場共獲1勝1和1負成績,絕對稱唔上係地頭蟲。
進攻乏力亦都係金絲雀成績停滯不前嘅原因,今季6場英超加埋先入咗4球,仲要嚟自4位唔同球員,冇孭飛嘅射手,今晚對車路士嗰陣,重點收購嘅荷蘭前鋒雲禾夫斯雲高據報受傷,就算勉強披甲都應付唔到90分鐘,領隊曉頓唯有喺加利賀柏同埋艾文達之間選擇一人攻堅,但呢兩位名氣頗大嘅球員都唔喺最佳狀態。


金絲雀前鋒唔夠銳
車路士方面,費蘭度托利斯肯定唔出得,預計伊度奧會代替佢登場,並努力爭取佢加盟英超後嘅處子球,不過獵豹冇貨交都唔緊要,因為藍戰士都習慣咗由中後場球員負責破門,大家不如寄望大衛雷斯、伊雲洛域、林柏特、拉美利斯同埋奧斯卡杜斯山度士等人入波仲實際。
缺席同中歐聯嘅夏薩特已經喺周五復操,但呢場比賽對佢嚟講仲係太趕,好在桑馬達再度獲得狂人重用,而且表現逐漸回復信心,有佢幫手較炮嘅話,車路士嘅創造力同埋穩定性都會提高。


狂人貫徹魚生粥慨念
狂人賽前叫班球員多啲投入感,仲話贏7場1:0總好過一場波炒人7:0,完全貫徹佢嘅魚生粥慨念,所以足智彩開讓球主客和,車路士嘅「讓客」真係好難買得落手,分分鐘贏咗一球之後就勒住勒住唔去,既然係咁就不如搏藍戰士小勝一粒,慢火煮呢隻金絲雀,何況車仔上屆嚟到都係贏1:0之嘛,搏3.35倍「讓和」咪啱晒囉!

论坛精华