紅魔死好運幸和薩克達 曼城慘敗甘拜下風

2013-10-04 05:30:00 来源:互联网


紅魔死好運幸和薩克達 曼城慘敗甘拜下風


曼市雙雄歐聯齊失分!柏歷堅尼亂咁排陣,累到曼城喺D組不敵衛冕冠軍拜仁1:3,佢個人職業生涯亦繼續贏唔到哥迪奧拿,而曼聯作客薩克達雖然被迫和1:1,但計點數真係唔輸都夠運,唯一亮點只係傑斯破歐聯出場紀錄啫。

紅魔鬼官網話朗尼患流感缺陣,但係領隊莫耶斯賽後就親證朗尼喺操練中俾韋碧克撞傷,從而導致脛骨腫脹,好在就冇乜大礙,嚟緊英超可以復出。曼聯迷聽完又唔好怪韋碧克喎,因為呢位黑先鋒作客烏克蘭嗰陣,只係用咗18分鐘就幫紅魔鬼打開紀錄,須知道呢球波幾乎係曼聯頭70分鐘內唯一射門,真係難能可貴。
當然啦,薩克達連續28場主場不敗嘅數據亦唔係流,泰臣巴些路斯喺76分鐘勁射追和之後,呢支烏克蘭勁旅仲繼續狂轟猛炸紅魔鬼後防,最後唔可以反敗為勝的確欠運,但係1:1嘅賽果對兩隊嚟講都唔算壞事,起碼佢哋都可以齊齊手握4分並列A組榜首,同日利華古遜就以2:1力克皇家蘇斯達,累積3分緊隨其後。


傑斯破歐聯出場紀錄
值得一提嘅係,曼聯老將傑斯第66分鐘後備落場,以145場呢個數字,打破咗魯爾所保持嘅歐聯最多出場紀錄,真係唔到你唔服架。
曼城喺歐聯D組亦攞唔到3分,仲要喺主場輸埋俾拜仁慕尼黑1:3添!領隊柏歷堅尼職業生涯教過維拉利爾、皇馬同埋馬拉加,但係都未試過擊敗由哥迪奧拿執教嘅巴塞隆拿,依家兩人都換咗球會,但柏歷堅尼一樣贏唔到,換言之佢成世人都未贏過哥迪奧拿,格食格到咁嘅地步!


赫特左右閘盡出洋相
不過柏歷堅尼唔怪得人架,佢無啦啦用傷癒嘅基捷基治同米卡李察士打左右閘,棄用近期表現好好嘅高拉洛夫同薩巴列達,結果搞到邊路俾拜仁打爆,加上門將赫特繼續低迷,結果列貝利、湯馬士梅拿同埋洛賓一人一球,拜仁早早拉開比數,曼城雖然有尼格度破蛋,不過最後都要輸俾有謝路美保定被逐嘅拜仁,會唔會連續3屆分組賽出局架?

论坛精华