法甲豪門打吡握手言和

2013-09-24 06:56:36 来源:互联网

法甲豪門打吡握手言和

法甲豪門打吡戰打成1:1平手!巴黎聖日耳門同摩納哥兩支夏天瘋狂購物嘅球隊,喺今個季度第一次互碰,結果聖日耳門有伊巴謙莫域先開紀錄,對方亦有皇牌法卡奧回敬1球,雙方打成1:1平手各取1分。
自開季以嚟一直話巴黎聖日耳門星味十足,但幾大主力太獨食,根本組織唔到太多有效埋門,而呢場對住摩納哥,對手教頭雲尼亞里一向擅守就更難打。事實上,當5分鐘伊巴接應傳中開紀錄後,聖日耳門多數攻勢都係浪射,全場18次射門僅2中,相對摩納哥成班兵新埋班未算夾得好,但前波圖三星占士洛迪古斯、祖奧摩天奴同法卡奧合作方面絕冇問題,上半場踢到20分鐘,就正正係祖奧摩天奴傳中交俾法卡奧飛身頂入,而齋講命中率,摩納哥全場15射有4中,以作客嚟講合格有餘。
呢場波最終以1:1打成平手,而巴黎聖日耳門主場贏唔到爭標對手摩納哥,某程度上同輸咗冇分別;更加不幸嘅係,球隊後防重心兼隊長堤亞高施華踢到16分鐘就拉傷,最新消息指呢名巴西國腳要唞6周,換言之嚟緊至少有兩場歐聯唔上得陣,難怪白蘭斯賽後都表示失望,而20分鐘被對手追和,同堤亞高施華傷出不無關係。
另一邊廂,雲尼亞里對取得1分好滿意,佢話一支咁後生嘅球隊打和聖日耳門表現好好,又話作客攞到1分已係成功,雲生係咪唔記得咗自己隊波值幾億歐羅呢?
 

论坛精华