保加利亞讓客合「意」

2013-09-06 12:04:24 来源:互联网

保加利亞讓客合「意」

意大利風雨飄搖,近4仗未嘗一勝已經夠衰,而家仲傳緊要換帥,加上巴洛迪利、奧斯華度同埋蒙杜利禾全部停賽,今晚喺世界盃B組外圍賽讓唔起保加利亞,捧「讓客」合邏輯。(周五22,now633及660台周六2:45am直播)
喺洲際國家盃不敵巴西之後,意大利就接連喺90分鐘內賽和西班牙同埋烏拉圭,最近友賽喺主場輸俾阿根廷,即係話已經連續4場波未贏過,難怪再上陣3次就可以成為意大利最多喼帽球員嘅保方都笑唔出,呢位祖雲達斯鋼門喺記招當中只係叮囑隊友要小心保加利亞,可想而知佢真係好擔心,同時反映意大利有隱憂。
巴洛迪利、奧斯華度同埋蒙杜利禾齊齊停賽喎,話你知冇隱憂都唔信啦,呢3個球員當中以巴洛迪利缺陣影響最大,畢竟艾沙拉維喺國家隊入球率好低,而森多利亞新星加比亞甸尼就明顯欠缺經驗,藍衣軍團都唔知靠邊個食糊。
場內唔掂,場外一樣咁混亂,由於教練柏蘭迪利去意已決,世界盃決賽周後一定請辭,所以意國足總都急急忙搵替身,人選包括AC米蘭嘅艾格里同埋退咗休唔算好耐嘅簡拿華路,不過咁早搵人隨時影響軍心,咁做真係唔明智。
客軍保加利亞喺世界盃B組走勢唔錯,暫以6戰2勝4和不敗嘅成績,手握10分排小組第2,其實同意大利都係相差4分,今戰佢哋有燕豪芬嘅曼奴列夫、中央陸軍嘅米蘭奴夫同埋拉斯彭馬斯射手迪利夫歸隊,絕對可以做一隻攔路虎,受讓一球捧「讓客」有得諗。

论坛精华