U21初戰歐國盃逢弱旅 英軍讓主摩法神采

2013-09-05 05:59:05 来源:互联网

歐洲國家盃U21外圍賽,英格蘭今晚首度喺A組亮相,面對實力平平嘅摩爾多瓦應可輕鬆取勝,新任領隊修夫基初試啼聲喜逢弱旅,亦肯定會叫旗下戰將全力數糊,所以讓兩球照捧「讓主」。(周四2,now621台周五2:45am直播)

其實修夫基首度點兵的確遇到少少阻滯,因為史雲斯中場舒維爾同埋新特蘭前鋒域咸都因傷退隊,佢哋唔單止會缺席今晚對摩爾多瓦一戰,連帶同周對芬蘭嘅外圍賽亦趕唔切落場,但好在呢支英格蘭U21仍然係人才濟濟,陣中大部份球員都熟口熟面,最重要係踢緊英超,好似利物浦右閘韋斯頓、修咸頓左閘勞基梳爾、曼聯新星韋費特沙夏同埋紐卡素嘅森美艾美奧比就係好例子,上周英超幫諾域治入波嘅列特文更加係狀態大勇,今戰鐵定以正選身份登場。
由於早前要踢歐國盃決賽周,所以英格蘭U21喺今次外圍賽遲咗出場,不過佢哋身處嘅A組冇乜具威脅性球隊,暫以3戰2勝1和排榜首嘅立陶宛U21都唔見得好突出,另外好似芬蘭、威爾斯同埋聖馬力諾更加無力威脅,英軍幼獅只要醒醒定定,要喺呢組突圍而出唔係難事。
 

摩爾多瓦實力有限公司
摩爾多瓦U21暫時喺小組以1勝1和成績排第3,不過佢哋贏嗰場係對住超級大魚腩聖馬力諾,埋單只係3:0已反映摩軍攻力麻麻。呢支客隊最出名嘅球員係射手米連簡奴同埋大場卡達連卡普,前者曾經喺法國摩納哥跟操,而卡達連卡普就係烏克蘭班霸基輔戴拿模嘅球員,不過並非正選,最重要係摩爾多瓦其他人腳主要喺本土效力,實力有限之餘,亦冇乜見過大場面,今晚作客英格蘭會唔會怯場都係一個問題。
足智彩今仗開讓球主客和,英格蘭U21讓兩球得低水1.7倍,證明莊家都好有信心,一於跟風買「讓主」博幼獅大捷。

论坛精华