轉會市場最後一刻大爆發 奧斯爾天價做兵

2013-09-04 06:07:07 来源:互联网

真係好睇過戲﹗今個夏天轉會窗唔止銀碼上破晒紀錄,最後幾個鐘過程更峰迴路轉,先係阿仙奴令人跌晒眼鏡地以天價簽得奧斯爾,雲格買一個人足已令全世界收聲。而曼聯就喺最後一分鐘先簽得費蘭尼,至於車路士就再次借走盧卡古,今次嘅受惠球會正是愛華頓。

喺英國當地時間下午開始,基本上成個英國球壇都係睇住阿仙奴同曼聯兩支未使過一毫子嘅球會較技。先係奧斯爾,兩支英超球會加埋聖日耳門都有出價,而令人意外嘅係,阿仙奴竟然出到4,250萬鎊(約5.13億港元)呢個數字,皇馬莫財都即時開綠燈,據知聖日耳門出價其實更高,但奧斯爾較傾向到英超發展,加埋前隊友梅迪薩卡喺德國國家隊推波助瀾下,唔使幾個鐘就同阿仙奴達成協議。
 

費蘭尼如願投曼聯
阿仙奴唔止打破薪酬架構給予「大眼仔」14萬鎊周薪,4,250萬鎊嘅轉會費更同時打破球會及今個英超轉會窗最高紀錄,難怪即時有阿迷喺酋長球場外慶祝啦﹗
眼見爭奪奧斯爾失手,曼聯嘅莫耶斯都加緊步伐再向多人出價,最終目標僅餘費蘭尼一人,但愛華頓一來因曼聯出價太低死唔放人,二來諗住從韋根簽咗占士麥卡菲做替補先,同時間就為幾名球員借用問題煩惱,一環扣一環下交易遲遲都未有定案;最後兩個鐘,愛華頓先從曼城借得英格蘭防中巴利,再借得盧卡古,最後半小時簽埋韋根中場占士麥卡菲,先至同曼聯傾費蘭尼事宜,最後曼聯以2,750萬鎊(約3.3億港元)完成第一亦係唯一一簽,而且本來早一個月用買斷價簽費蘭尼根本唔使咁貴,曼迷唔嬲就假﹗
當然最後個幾鐘都唔只咁少轉會,其中新特蘭分別從利物浦同意甲拿玻里借得波連尼與杜辛拿,西布朗就以1,200萬鎊買到施斯隆及安尼捷比。

论坛精华