兵工廠傷將太多 奴不可破富咸下盤

2013-08-24 09:19:07 来源:互联网

富咸同阿仙奴喺今晚嘅英超早場合演倫敦打吡,勝負確實好難預料,皆因名氣較大嘅兵工廠傷兵太多,表現亦相當飄忽,加上作客卡雲農舍戰績差,所以富咸受讓平手、半球乾脆捧下盤好過!(周六13,now621台周六7:45pm直播)

首輪作客擊敗新特蘭嘅富咸,今仗回歸主場有新加盟嘅門將史基倫堡倦勤,另外基蘭李察臣亦都受傷,其位置要由馬菲比格斯代替,而另一新兵中堅阿武列比達亦都未好番,望落似乎係有啲危機,不過大家只要回顧番富咸喺開鑼戰嘅陣容,就會發覺領隊祖爾仍然用一班舊將做骨幹同藍本,例如鎮守中路嘅軒治蘭特同艾朗曉士,中場續由杜夫領軍,前場例牌以貝碧托夫衝鋒陷陣,所以默契方面基本上唔需要再磨合。
事實上,富咸雖然只係中型班,但今屆兵源相當唔錯,泰拉拔同埋戴歷保定一對新兵都幫到手,加上對黑貓時一箭定江山嘅卡沙米明顯日漸成熟,以佢哋近5次對兵工廠僅嘗1敗嘅數據嚟睇,今晚喺卡雲農舍球場出擊至少都可坐和望贏。
阿仙奴首輪英超喺主場不敵維拉1:3,13年嚟首次喺聯賽開鑼戰輸波,雖然球隊緊接於歐聯附加賽作客大勝費倫巴治,但體力上就難以避免打咗折扣,尤其係兵工廠目前嘅傷兵史無前例咁多,阿歷士張伯倫、阿迪達同埋戴亞比唔踢得之餘,中堅哥斯尼亦都要停賽,故即使西班牙左閘蒙利爾復出亦無補於事,預料領隊雲格要搵沙格拿串演中堅,真係未必睇到實貝碧托夫。


舊部法米尼免費返「廠」
其實兵工廠會方日前已經發公開信俾球迷,強調全隊唔會放棄,繼續以英超冠軍作目標,不過球隊仲未簽到猛將加盟,舊人法米尼並唔能夠令到擁躉鼓舞,所以佢哋今晚作客富咸真係危危乎,咁嘅環境仲要讓平手、半球,買富咸起碼都穩執半個盤啦!

论坛精华