韋利安抵倫敦日內投熱刺

2013-08-22 05:05:44 来源:互联网

效力緊俄超安治嘅巴西球星韋利安已經抵達倫敦,準備接受熱刺幫佢準備嘅體測,如無意義嘅話,佢將會以3,000萬英鎊(約3.5億港元)登陸英超,呢位森巴國腳嘅位置係埃住左路邊線發難,間歇性喺中間插入禁區,踢法加里夫巴利十分相似!
由於熱刺早前已經連簽荷西保連奴、蘇爾達杜同埋查迪尼等新援,韋利安再成事的話,球隊今夏嘅轉會支出就會突破9000萬英鎊,唔賣走加里夫巴利去皇馬真係好難填番條數,聽聞熱刺仲吼實羅馬嘅阿根廷左翼拉美拿(圓圖),成件事呼之欲出啦!
同樣位處北倫敦嘅阿仙奴就斯人獨憔悴喇!手握超過7,000萬英鎊嘅轉會資金,又還晒興建酋長球場嘅貸款,但領隊雲格同班高層仍然揸到條數好緊,繼早前以「4,000萬英鎊加1蚊」嘅騎呢招斟蘇亞雷斯不果之後,佢哋再以侮辱價斟紐卡素中場卡比耶,結果俾人哋領隊柏祖鬧到一面屁。
消息指雲格最近唔知發咩神經,突然對皇馬門將卡斯拿斯有興趣,佢不如慳番啖氣,搵啲可能性較大嘅球員啦!例如正正經經斟下史雲斯中堅艾殊利威廉斯仲實際,轉會窗仲有唔夠10日就閂喇!
 

论坛精华