馬體半場大機會「隆」

2013-08-21 18:36:44 来源:互联网

今晚多場歐聯可能都唔及西班牙超級盃咁精彩,馬德里體育會今季賣走法卡奧,但換嚟迪亞高哥斯達大爆發,實力不遜去年,而巴塞用番哥迪奧拿時代打法,立竿見影第一場西甲即大炒利雲特7:0,呢場波雙方都唔會太保守,捧半場大。(周三24,now632台周四5:00am直播)
巴塞暑假歡送維拿路華離開,絕對係比羅致尼馬更明智嘅決定。維拿路華上季希望改做巴塞打法,但全隊冇一個人適應到,又死都唔肯用番哥帥年代打法,兩回合慘敗俾拜仁0:7可謂買個教訓。
至於馬天奴上任後,即時恢復嗰種快到冇腳影捉嘅傳球,以3、4人小組猜空對手再由唔同球員入楔,第一場聯賽對利雲特,幾乎7個入波都係用呢招攞番嚟,難怪連沙維都話上季巴塞大部分時間都冇戰術性訓練,好多謝馬天奴撥亂反正,擺明暗串維拿路華冇料到啦。而事實上,今場巴塞即使作客,睇怕啲火力都收唔埋,因為上一場大勝7:0,除咗美斯早早被換走外,恩尼斯達都只係後備出場,而尼馬更只係踢咗唔夠半個鐘,今晚對馬體會嚟個「夫添」出擊,真係防不勝防。
馬體會方面,可能連莊家都以為呢隊波冇咗法卡奧會大跌「Watt」,但事實係,上季因遷就法卡奧而改任邊鋒之迪亞高哥斯達,今季一擔正即時大爆發,而其餘位置亦變動不大下,馬體會至少保留到上季9成能力;更需留意嘅係,馬體會打法以體力性壓迫為主,所以上季佢哋喺上半季成績遠比下半季佳就係呢個原因,今戰有主場兼季初體力充足,要撕破巴塞一條不穩嘅防線應該冇問題。
巴塞上季雙殺馬體會,無疑有啲格食格,但上季2次都係由馬體會先開紀錄,就更加容易構成多波入局面,奈何呢場波足智彩大細僅開2.5球低水,擺明唔想輸太多,一於吼佢半場已有2粒,博半場大。

论坛精华