兵工廠要人冇人 費倫巴治下盤秤仙

2013-08-21 18:34:38 来源:互联网

自作自受!雲格成個夏天不斷吹噓有幾多錢買人,但直至呢1分鐘為止仍然1毫子都未使過;結果一氣放走17人,兼且遇到突如其來嘅傷兵潮下,兵工廠依家連砌一隊正選出場都有問題,今晚佢哋殘陣到訪土耳其費倫巴治,根本冇優勢可言,主隊受讓平半似乎捧得過。(周三18,有線61及201台周四2:45am直播)

阿仙奴喺整個暑期都係主角,不過雲格食古不化,每每開出低於正常價錢嘅轉會策略,令到兵工廠一條友都買唔到;而最慘係喺上場聯賽對維拉前,陣中本已有華美倫、蒙利爾、阿迪達3大傷兵,結果一場比賽過後再有阿歷士張伯倫證實至少養傷半年,沙格拿頸部及基倫傑比斯頭部分別受傷仍未知可唔可以喺今晚上陣,如此殘陣真係對任何球隊都冇優勢。
 

阿仙奴內部氣氛差
冇人用雲格唔心急咩?咪又係皇帝唔急太監急囉!基奧特公開表示需要多一個箭頭分擔入波重責,而雲格有出價,但就出1,200萬鎊要紐卡素嘅中場卡比耶,又惹嚟人哋領隊柏祖鬧鬼係侮辱性出價,早幾日先有大批球迷公開要求球會買人同埋改革,依家搞成咁球隊氣氛好極有限。
 

薩格勒布戴拿模有計
其實費倫巴治都唔好得去邊,佢哋喺土超聯賽第一戰同樣落筆打三更輸波,而隊中主力前利物浦球星古積特,上周入選荷蘭大軍,於操練時與隊友約拿芬迪根斯文頭撼頭,眼蓋縫咗10幾針,睇怕冇咁快趕得切喺呢場歐聯附加賽上陣;但話雖如此,土耳其主場一向唔講得笑,何況阿仙奴又冇兵用,費倫巴治主場受讓平半,依然可以秤高些少。
至於薩格勒布戴拿模對奧地利維也納;薩格勒布戴拿模身處嘅克羅地亞聯賽級數稍高,上圈亦擊敗甚有能力嘅舒列夫狀態唔差,應該可以憑主場之利先下一城。(周三17,香港時間周四2:45am開賽)
最後布加勒斯特星隊對歷基亞;星隊上兩圈都輕鬆過關,而且攻力有保證;而歷基亞喺上一圈兩回合僅賽和莫迪,只憑作客入球出線質素有限,再捧主勝。(周三21,有線63台周四2:45am直播)
 

论坛精华