客軍大量主力離隊 阿積士讓主飲得杯洛

2013-08-02 06:59:04 来源:互联网

客軍大量主力離隊 阿積士讓主飲得杯洛


荷甲開鑼戰由上屆冠軍阿積士喺主場對陣洛達,讓兩球都一定要捧「讓主」,事關客隊有多名骨幹離隊,領袖人物費迪魯斯又要坐波監,反觀阿積士購入唔少猛將,故此讓幾多都有權大炒!(周五4,now670台周六2:00am直播)

阿積士喺季前熱身賽7連勝,對手並唔係嗰啲泰國、馬來西亞同印尼明星隊,而係奧沙辛拿同埋雲達不來梅等歐洲一線聯賽份子,再加上啱啱憑加時擊敗阿爾克馬爾捧走荷蘭超級盃,可見佢哋目前嘅狀態相當理想。不斷傳出會轉投熱刺嘅中堅艾達韋列特,仲有被利物浦睇中嘅丹麥國腳基斯甸艾歷臣目前仍在陣中,雖然唔知佢哋仲可以踢幾耐,但起碼呢一刻仲可以候命,阿積士當然用得就用,盡量贏咗比賽先再算。
明知道主力會被挖角,呢支荷甲衛冕冠軍都冇坐以待斃,搵嚟巴塞隆拿射手保贊、上季效力富咸嘅艾安安奧,甚至雲達沙囝囝祖爾番嚟,而重點收購就係價值380萬歐元(約3,800萬港元)嘅烏德勒支後衛雲達賀奧,形成依家個一隊陣容超多人可以用,呢一刻嘅阿積士確實勁到爆!


洛達對賽往績差劣
洛達嘅情況就比較濕滯,佢哋喺夏天一共放走咗8位球員,當中好似轉投帕爾馬嘅中場丹尼路彭利拿、去咗墨爾本雄心嘅後衛韋拿特,同埋匈牙利國腳譚馬士卡達,喺上個球季都係洛達嘅骨幹成員,另一位摩洛哥國腳阿爾藍斯仲衰到冇班落都唔肯續約,唔通留喺洛達真係冇前途?
欠缺有份量嘅新援加盟,又走咗批主力,洛達本身已經好大鑊,再撞正比利時孖寶馬田蒙迪尼同埋迪比奧利受傷,隊長費迪魯斯又要坐波監,教練邦隆特都坦言為今場排陣而傷腦筋,咁又係嘅,前幾季夫添嚟到阿姆斯特丹都只係取得1和4負劣績,今時今日天殘地缺,真係諗唔到洛達有乜嘢籌碼爆冷,一於捧阿積士「-2」啦!

论坛精华