滂沱大雨每場踢80分鐘收工 曼城小勝南華有交代

2013-07-25 06:26:01 来源:互联网

滂沱大雨每場踢80分鐘收工 曼城小勝南華有交代


英超挑戰盃大球場開戰﹗雖然賽前滂沱大雨令比賽延遲開波,兩場賽事都縮減至80分鐘,但完全冇影響在場35,950人嘅高漲情緒。3支英超球隊在施展渾身解數下,頭場爆出小冷門新特蘭擊敗熱刺,尾場曼城小勝今場鬥志一流嘅南華,決賽於本星期六上演,勢必再度掀起全城足球狂熱﹗

3支到訪嘅英超球隊之中,曼城係最有實力,亦都係最有誠意嘅一隊。今次來港陣容中,4名高價新兵費蘭甸奴、捷西斯拿華斯、尼格度及祖維迪都飛到嚟同球隊會合,雖然前日操練時占士米拿已露口風,幾名新兵都唔會正選披甲,而且今場都可能有一啲年青球員上陣,但好彩嘅係對於香港觀眾嚟講,呢個預言只係講中一半。事關正選陣容一出,曼城陣容上既有新兵費蘭甸奴在陣,更加未有半個年青球員落場,尤其防線上用上赫特、基捷基治、尼史葛、薩巴列達及隊長高柏尼,根本上就係上季正選陣容,前線由迪斯高、拿斯尼及占士米拿領軍,咁嘅牌頭算係俾足面主隊嘅南華。


周六決賽鬥黑貓
面對強陣嘅曼城,作為上屆港甲冠軍嘅南華都未有怯場,首15分鐘更多次瓦解曼城攻勢,不過曼城球員勝在技術經過兼備,比賽踢到10分鐘,占士米拿擺脫南華後衛右路傳中,迪斯高伏兵門前輕鬆頂入成1:0;幸好南華未有因為落後就散晒,半場落後一球都算交足貨。
因應頭場縮短比賽時間關係,呢場波都係上下半場各踢40分鐘,而換邊後南華都把握有限時間向曼城展開反擊,幾次右路攻勢都迫使曼城後衛清出底線,打至55分鐘左右,全場更情緒高漲,事關新近以高價加盟嘅前鋒尼格度後備落場,而呢名西班牙國腳都交足貨,先係62分鐘次半倒掛越楣而出,其後一次墮後校炮俾迪斯高,後者控定狂抽只係過唔到今場有出色表現嘅張春暉,最後雙方再無進帳下,曼城僅以1:0小勝南華,將喺星期六同新特蘭上演決賽。

论坛精华