初訪越南再開客其他 阿仙奴大炒七個一皮

2013-07-18 06:24:33 来源:互联网

初訪越南再開客其他 阿仙奴大炒七個一皮


作為第1支到訪越南國土嘅英超球隊,阿仙奴今場友賽真係交足貨,佢哋唔單止用咗大半隊主力做正選,仲特別搵咗《RunningMan》做嘉賓一齊列隊,最重要嘅當然係送上大量入球氹各位開心啦!埋單大勝越南國家隊7:1呀!

比賽開始之前,主辦單位特別搵咗班政要嚟致辭,包括駐越南嘅英國大使館官員,但係最搶鏡嘅仍然係陪住阿仙奴出場列隊嘅RunningMan,呢位仁兄就係日前用電單車追兵工廠大巴,撞燈柱倒地後繼續喪跑,繼而感動阿仙奴職球員,俾佢上巴士同球員簽名影相嗰位越南球迷。今次佢更獲安排企普多斯基隔離,只見嘉賓講嘢時,RunningMan係咁撩呢位德國國腳傾計。
領隊雲格真係俾足面主人家,唔係指比數,而係指出場陣容,只見門將用施捷斯尼,中場有路斯基、阿迪達、阿歷士張伯倫,後防雖然由哥斯尼夥拍沙格拿打中堅,但其實星味仍濃,唯一新人只係英格蘭U19國腳嘅艾普,德國國腳梅迪薩卡,仲有兩大球星禾確特同韋舒亞下半場亦有入替,算對得住買飛入場嘅球迷啦!
基奧特上半場連中三元,憑一己之力已經幫阿仙奴遙遙領先越南國家隊3:0,換邊後阿歷士張伯倫入世界波,然後艾普梅開二度,加上另一新人恩拿斯米基爾亦建一功,兵工廠差啲又重演上仗怒炒印尼明星隊七粒嘅賽果,好在尾段10人應戰嘅越南破到蛋輸1:7,其實都算有交代喇!阿仙奴連續大勝後會移師日本繼續亞洲之旅,到時會對名古屋鯨魚同埋浦和紅鑽,以日職嘅實力,應該唔會再出現「客其他」賽果喇啩!


車路士小勝泰國1:0
至於另一支訪問亞洲嘅英超球隊車路士,噚日就踢左摩連奴再上車嘅第一戰。對手只係泰國明星隊,首次着起車路士波衫嘅舒賀爾尼表現不過不失,而回歸嘅盧卡古就喺上半場射入12碼,最終幫車路士小勝1:0完場。

论坛精华