話題人物朗尼隨軍 曼聯抵泰國展亞洲之旅

2013-07-12 08:32:15 来源:互联网

話題人物朗尼隨軍 曼聯抵泰國展亞洲之旅


英超冠軍曼聯喺噚日抵達咗曼谷,正式展開佢哋2013年嘅亞洲之行,尹佩斯、迪基亞同埋香川真司要遲啲先歸隊,無緣本周六對泰國明星隊嘅表演賽,不過盛傳轉會嘅朗尼有隨軍,新援韋費特沙夏亦嚟咗,只係佢明顯未適應踢大球會啫!

當曼聯全隊西裝筆挺出現喺曼徹斯特機場時,韋費特沙夏竟然著住T恤牛仔褲施施然嚟到,及後球會保安話佢知衣著唔合規格,搵咗套西裝俾呢位英格蘭小國腳替換,所以抵達曼谷機場之後,大家都見到佢執番正喇!韋費特沙夏應該唔係有心犯規嘅,以前踢水晶宮著拖鞋都冇所謂,但曼聯係大球會,當然要有形象啦!呢位翼鋒以後要適應下,咪再用街坊Look亮相喇!
除咗韋費特沙夏之外,盛傳被阿仙奴同車路士挖角嘅朗尼都有隨軍,或者咁樣係意味住佢最終留隊都唔出奇,畢竟新領隊莫耶斯都坦言同朗尼傾過至少4次,可能真係被誠意打動呢?雖然今次曼聯只有19人飛抵曼谷,不過有里奧費迪南、韋碧克、湯卡華利、傑斯同埋艾拉等星級球員壓陣都唔失禮,難怪泰國球迷接機時依然興奮莫名,歡呼聲不絕至於尹佩斯同迪基亞就會喺悉尼站先加入,香川真司就喺日本站歸隊,香港作為最後一站最抵,到時乜人都齊晒!
可能大家會問,如果曼聯遲啲斟到新兵,又會唔會中途插入呢?呢個確實係一個好問題,不過發生嘅機會唔大,因為令紅魔鬼心儀已久嘅球員都九成被截糊,最唔抵嘅當然係堤亞高艾簡達拿啦!搞咗咁耐,原來呢位巴塞小將想跟番舊教練哥迪奧拿搵食,轉投拜仁慕尼黑已幾近落實,估唔到曼聯埋到埋口唇邊都食唔到。


傳艾簡達拿轉投拜仁
另外,有傳甚得莫耶斯歡心嘅費倫天拿球星祖維迪亦會選擇曼城,因為藍月亮夠誠意,連合約都準備好,紅魔鬼第日要出手快啲喇!

论坛精华