墨爾本城細打翻身戰

2021-02-23 09:40:49 来源:网络

澳職周二上演重量級大戰,墨爾本城主場迎戰FC悉尼,亦係上屆季後賽總決賽嘅翻版戲碼。兩大班霸今季開局唔多順利,墨爾本城3連敗後只排聯賽第10位,表現不穩嘅FC悉尼亦只排喺第5位。不過「爛船都有三斤釘」,墨城本身陣容雄厚,經過逾兩星期休息後可望重整旗鼓,主場出擊有力與悉尼拉成均勢,博中位數2.5球入球細。

(周二下午4時05分開賽)

墨爾本城今季成績令人失望,近3場聯賽全敗後跌至聯賽榜尾3位置,不過從表現上睇其實唔算太差,球隊經常能夠製造入球機會,只係最後一腳嘅把握出現問題,近兩場都係力戰下僅敗。

悉尼多傷兵唔敢亂攻
自上場輸畀紐卡素噴射機後,墨爾本城已有超過2星期休息,翼鋒納博特傷愈回歸、中堅卻連史杜基斯亦刑滿復出,加上王牌前鋒占美麥卡倫壓陣,貴為上季澳職亞軍嘅墨爾本城實力強橫,有力抵擋FC悉尼。

作客嘅悉尼略見回勇,近3場聯賽2勝1和,不過傷兵問題卻加劇,中場主將基斯蘇維拿嚴重膝傷,經檢查後證實今季提早收咧,球隊目前亦有布夏基亞、雲達沙格及米高蘇路等「十字兵」,人腳買少見少下比賽將會步步為營,始終聯賽係長途賽事,同競爭對手交鋒會更加小心。兩隊近年對碰都格外謹慎,近5次交手4次總入球開2球或以下,今仗可以再追細盤。