錫菲聯死火悶鬥紐卡素

2021-01-12 10:14:46 来源:网络

周三凌晨英超下游大戰,錫菲聯將會喺主場迎戰紐卡素。「包尾大幡」錫菲聯今季最大問題係進攻乏力,今場遇上火力同樣欠奉嘅紐卡素,比賽場面肯定唔太開放,2.5球嘅入球細值得留意。

(Now 621周三凌晨2時直播)

上季升上英超嘅錫菲聯,憑出色整體性踢法頻頻搶分,最終拎到聯賽第9位,表現令人眼前一亮,可惜錫菲聯今季大跌Watt,敬陪積分榜榜末。領隊韋達雖然帶領球隊升班有功,但佢同球會管理層喺引援投入不足問題上面,分歧愈嚟愈嚴重,內部矛盾進一步影響球隊發揮。錫菲聯英超17場戰罷,依然一勝難求,最大原因係入球能力嚴重不足,近4仗聯賽僅入1球,聯賽至今總共只攻入8球,係英超入球數字最少球隊,今仗惟有靠後面死守博大霧。

「喜鵲」聯賽作客旺細盤
紐卡素雖然同降班區仲有一定距離,但依然唔可以掉以輕心。今季新加盟嘅射手哥林威爾遜,聯賽至今斬獲8球,可惜其餘隊友只有中場軒迪克射入多過一球,暴露球隊入球板斧不足問題。早前不幸確診新冠肺炎嘅辛特麥斯明,雖然已重返訓練場,但缺陣多時狀態難有保證。「喜鵲」今季作賽踢法明顯較保守,7次聯賽作客有6次開兩球或以下,今場遇上火力疲弱嘅錫菲聯,隨時再演「悶波」,中位數2.5球入球細值博。