無鋒難起浪曼城半和秤仙

2020-10-17 07:15:45 来源:网络

今晚另一場矚目大戰,曼城主場鬥阿仙奴,亦係兩軍主帥兼師徒哥迪奧拿與阿迪達交鋒。曼城出閘脫腳,阿古路啱啱好番未必有態,咪旨意佢做救世主;近年聯賽碰頭「兵工廠」輸得太多,作客必先做好防守,加上近期旺半場和,值得再追。

(Now 621及611周日凌晨零時30分直播)

奇雲迪布尼唔出得
曼城自聯賽開咧戰擊敗狼隊後,先喺主場慘敗畀李斯特城2比5,隨後作客列斯聯只能和1比1,罕有咁連續2場聯賽失分。之後嘅國際賽期奇雲迪布尼受傷退隊,哥迪奧拿已證實佢唔出得,雖然養傷多時嘅箭頭阿古路已經復操,據報會先任後備,不過狀態難有保證,對於崇尚進攻嘅「藍月亮」嚟講,欠缺正宗前鋒,繼續用史達寧裝「假9」,絕非上策。

阿仙奴開咧4場獲3勝1負,新加盟嘅湯馬士柏迪今仗甚有機會登場,不過佢哋近6次聯賽對曼城輸晒,主帥阿迪達唔敢輕舉妄動必先鞏固防守,何況「達Sir」屬穩陣派,連盃賽在內近5場有4次開半場和,再追可也。