水手搶攻半場搞掂

2020-09-16 09:54:39 来源:网络

心跳練兵當踢熱身賽
周三日職重頭戲,橫濱水手主場迎戰清水心跳。心跳唔只6連敗,而且近5仗半場全部落後,似乎對勝負一啲都唔着緊,原因係今季日職取消降班,心跳教練奇林莫夫斯基畀多啲青年球員上陣吸收經驗,水手急欲反彈,定必藉地利搶攻對手,吼半場主勝。(有線661及601台周三晚6時30分直播)

由於疫情關係,今季日職不設降班,下季日乙前兩名升班後,由20支球隊爭逐。換句話講,清水心跳即使今季1場都唔贏,下季都可以繼續喺日職競逐,心跳教練奇林莫夫斯基就趁呢個機會練兵,畀多啲後生仔上陣,等佢哋吸收經驗之餘,亦可以增加兵源應付下季多咗場數嘅日職賽事。

心跳6連敗,除咗主場對柏雷素爾一役只換2名球員,其餘5場用盡5個換人名額,原則上奇帥係不停咁試唔同陣式,根本當今季係熱身賽咁踢,幾個「00後」球員鈴木唯人、粟原伊巴謙等都有出場機會,其中前者更多次正選落場。

面對「讓半臂」嘅心跳,水手唔贏真係對唔住自己,呢支上季盟主今季大跌Watt,現時只排第10,佢哋啱啱經歷3連敗,管理層有怨言,球隊上下均有壓力,今仗不容再失,求勝心切下定必速戰速決,力求盡快取得入球,半場主勝值得捧場。