賓福特打爆富咸

2020-08-04 10:56:40 来源:网络

趕搭衝超富貴列車
今晚喺溫布萊球場上演英冠附加賽決賽,爆發西倫敦打吡,由「蜜蜂仔」賓福特硬撼富咸,爭取搭上價值1.7億鎊(約17.15億港元)「衝超」尾班車。查實兩軍旗鼓相當,不過賓福特從未升上英超,反而更有飢渴感,射手奧尼屈堅斯腳風奇順,何況近年交手食住富咸,為名為利實搏盡,主勝有買趁早。

(周三凌晨2時45分開賽,馬會網上文字直播)

賓福特雖然喺聯賽最尾兩輪輸晒,痛失亞軍及直接升班資格,但佢哋之前7場聯賽贏晒,係復賽後其中一支狀態最好球隊,而且去到英冠附4強首回合先輸0比1嘅劣勢下,次回合成功收復失地,以3比1擊敗另一支具英超經驗嘅「天鵝」史雲斯,兩回合計反勝3比2晉級,證明賓福特打逆境波一樣咁掂。連同英冠附射入扳平球在內,賓福特前鋒奧尼屈堅斯今季聯賽已有26球進帳,配合賓華馬及麥比奧莫,呢支英冠火力最強球隊,邊隊對佢哋都驚驚。

富咸米祖域頂硬上未必好
另一邊廂,富咸喺英冠附4強首回合領先2球下,最終兩回合計險勝卡迪夫城3比2,表現明顯跌Watt。而且今季聯賽入咗26球嘅射手阿歷山大米祖域因傷患關係,附加賽4強兩回合都冇份披甲,雖然消息指佢今場可以復出,但狀態未必托弗。睇番阿歷山大米祖域係富咸陣中唯一入球達雙位數嘅球員,過於靠佢數胡,一旦被箝制即令火力大減。儘管富咸兩年前都係藉附加賽決賽贏波衝超,不過睇番雙方近4次碰頭,「蜜蜂仔」取得3勝1和未輸過,包括今季聯賽雙殺對手,擺明格食格,為球隊歷史性首度殺上英超、爭取1.7億鎊收入必定搏甩髀,主勝值得捧場。