曼城夠卡士爆廠

2020-07-18 10:12:51 来源:网络

4強開火向3冠邁進
英格蘭足總盃4強展開,阿仙奴同曼城今晚喺溫布萊球場率先拉開戰幔。曼城往績佔優,「兵工廠」近7次對賽全敗之餘,只曾入過2球,反觀曼城每場均贏2球或以上,級數明顯有別。「藍月亮」力爭做盃賽3冠王唔會手軟,讓球盤曼城讓1/1.5球,照捧上盤!

(無綫85台周日凌晨2時45分直播)

曼城及阿仙奴周中聯賽同以2比1擊敗般尼茅夫及利物浦,「藍月亮」藉大衞施華爆發,一傳一射技術性擊倒對手;「兵工廠」砌低聯賽冠軍利物浦睇落好勁,其實要多得「紅軍」後防連番犯錯,阿仙奴全場僅得3腳射門,捱打下贏波帶幸運成分。

阿仙奴防線靠唔住
阿仙奴今季最為人詬病嘅,係後防經常出醜,不論梅斯達菲、大衞雷斯或哥拉辛拿斯,都未能予人信心。佢哋復賽首戰就慘吞曼城3蛋,當日後備入替嘅大衞雷斯先喺上半場截波失誤畀史達寧建功,再喺下半場初段侵犯馬列斯,領紅出場兼輸12碼,連同呢場敗仗,阿仙奴近7次對曼城輸晒,仲要全部輸2球或以上,話就話同屬英超Big 6,但近年差距已愈來愈大。

遇師傅阿迪達交學費
曼城歐洲禁賽令上訴成功,全隊都鬆口氣,可專注番未來賽事,何況「藍月亮」係上屆英足盃盟主,今屆肩負衞冕重任,球隊早已贏得英聯盃,正向英足盃同歐聯進發,力求成為「盃賽3冠王」,而且論執教功力,哥迪奧拿正正係阿迪達師傅,哥帥深明「放虎歸山」道理,就算領先都唔會勒住踢,寧願攞多幾個「燕梳球」,上盤值得捧場。