光輝搶W冇留手

2020-07-18 10:12:31 来源:网络

科拿路利入球停不了
今午澳職獨腳戲,珀斯光輝對中岸水手。雖然5哥光輝傷兵滿營,但水手今季聯賽演出差到冇朋友,頻頻輸波淪為包尾,光輝可恃質喺重開首擊打響勝鼓,主勝有計。

(myTV Gold 302、Now 639、有線655、615台周六下午3時直播)

雖然因疫情關係,今場改於新南威爾斯高士福中部海岸體育場舉行,其實即係水手主場,但光輝仍根據原定賽程,被列為「主隊」,實際上係作客。光輝喺停擺期間問題多多,隊長迪亞高卡斯度以疫情影響家人為由,拒絕參與今季餘下賽事,佳哥利胡夫歷治及金洙範亦相繼走人。好彩前鋒科拿路利未有離隊,呢位烏拉圭射手今季聯賽已入12粒,交足功課,亦成為球隊喺季中放走前鋒基奧治嘅主因。

水手聯賽輸到慌
水手之前兩季都包尾收場,今季打咗22場得4勝咁大把,繼續敬陪末席。單計停擺前10場聯賽,水手全部輸晒,其中有7場輸2球或以上,包括對西部聯慘敗2比6,防線猶如不設防,短期內難望反彈。

況且光輝近年專剋水手,雙方近6次交鋒,光輝豪取5勝1負,其中有4次於上半場已經領先,而且一贏到尾,擺明格食格,重開首場必定痛打落水狗,主勝固然熱得有理,進取啲可捧埋半場主勝。