作客死火巴塞讓唔起維拉利爾

2020-07-05 09:44:38 来源:网络

周日深夜西甲尾場,「黃色潛水艇」維拉利爾主場火併巴塞隆拿。巴塞內亂不斷,最新消息就係盛傳球王美斯中止續約談判,所觸發嘅震動無法估計,而且佢哋今季作客腳軟,頻頻失分不宜高估,「黃色潛水艇」自復賽後愈戰愈勇,為爭下屆歐聯入場券必定搏盡,受讓必捧讓球主勝。

(Now 632周一凌晨4時直播)

美斯拒續約引爆內亂
巴塞內亂從未止息,近期更爆兵變,多名主力不滿主帥史坦恩臨場調動,並發生爭執,嚴重影響士氣,有傳呢位中途上任嘅老帥,隨時被解僱,傳聞沙維、朗奴高文可能接手,消息立立亂;西班牙電台仲爆出驚天猛料,傳出球王美斯中斷與巴塞隆拿嘅續約談判,更令軍心大亂。喺西甲賽場上,「地上最強」於爭標路途陷入被動,與客場戰績不濟有關,今季聯賽16場聯賽作客僅獲6勝,造訪愛斯賓奴、切爾達、奧沙辛拿等弱旅都失分而回,包括近8場聯賽作客只得2勝,隊長美斯亦獨力難支。

前列分子維拉利爾,自復賽後連場報捷,近6場聯賽取得5勝1和,只落後4哥西維爾3分,仍有機會爭取下屆歐聯席位,戰意必堅,中場辛迪卡索拉於今季聯賽入8球及交出8次助攻,老而彌堅,令前線謝拉特摩蘭奴及柏高艾卡沙不愁供應。「黃色潛水艇」今季16場聯賽主場僅3敗,加上近4次主場對巴塞只1負,受讓有計。