爭踢歐聯群雄打崩頭

2020-07-04 11:16:46 来源:网络

歐聯獎金、電視直播及商業收益異常豐厚,保守估計球隊最少有4,000萬歐元(約3.5億港元)收益,喺疫情影響經濟下,呢筆收入更加彌足珍貴,李斯特城、車路士、曼聯同狼隊,齊齊吼住呢個大金礦,英超群雄歐聯入場券爭奪戰,隨時踢到最後一場先分出高下。

曼聯發茅 上盤冇甩拖
排聯賽第5位嘅曼聯被指躋身前4機會最濃,因為餘下對手最好踢,例如今晚就會主場對3連敗嘅般尼茅夫。「紅魔鬼」於英超重開後順風順水,聯賽接連搶分之餘,英足盃亦殺入4強,曼聯近4場主場出擊,3次贏3球或以上,讓球盤曼聯讓兩球都唔怕,照捧上盤。

(Now 621周六晚10時直播)

曼聯復賽後連盃賽2勝2和,而且有愈戰愈勇之勢,主因曼聯領隊蘇斯克查輪換成功。「蘇B」喺聯賽重用兩位中場猛將保羅普巴同波基斯費南迪斯,前鋒線上安東尼馬迪爾、拉舒福特、恩哈路同格連活特輪流上陣,而且都有上佳表現,火力強勁要入多幾球都唔成問題,今場更有搶分決心,值得睇好。

作客嘅般尼茅夫雖然要搶分護級,可惜佢哋復賽後表現未見起色,成班球員狀態仍未操起,先後不敵水晶宮、狼隊及紐卡素,攞唔到分之餘3場更加只入得1球,攻力弱得可憐,今場作客奧脫福難有爆冷空間,捧曼聯上盤啱數。渡邊年

狼隊撻着 弗到爆廠
狼隊復賽之後勇態持續,連續3場贏波兼且未失1球,周日凌晨主場迎戰「疲兵」阿仙奴,客隊嘅注意力似乎已逐漸轉到英足盃上,狼隊主場氣勢如虹,主勝值得支持。

(Now 621周日凌晨零時30分直播)

狼隊今季一直名列前茅,實力之強早已躋身一線行列,停擺期亦未有影響球隊狀態,復賽後連贏韋斯咸、般尼茅夫同阿士東維拉,近6場聯賽錄得5勝1和佳績,而且對上8場聯賽更有7場不失球,可以話係攻守兼備。狼隊依家只係距離第4位嘅車路士2分,相差第3位嘅李斯特城亦不過3分,仍然有機會爭取來季歐聯資格,主場出擊戰意非常高昂。

阿仙奴喺英足盃已經殺入4強,成為出戰來季歐霸盃另一途徑,因此「兵工廠」難免會將注意力轉移,何況阿仙奴復賽後3日1戰,今場係18日內第6場比賽,球員體能已被消耗得七七八八,作客鬥狼隊凶多吉少。工廠仔

車仔遇私房菜開大餐
今晚英超尾場上演車路士對屈福特!作客嘅屈福特後防每逢面對車路士,就有如「放題式」崩潰,任由「車仔」魚肉,除咗近7次交手6次不敵車路士,全部總入球均達3球或以上,適逢車路士上仗僅負韋斯咸,要搵人祭旗,今戰相信會大開殺戒,捧2.5球入球大。

(Now 621周日凌晨3時直播)

屈福特雖然要搶分護級,但作客車路士有一定困難,「大黃蜂」以往面對車路士飽受凌辱,近7次對壘失18球,而且入球球員眾多,近至「譚仔」譚美阿巴謙、「美國隊長」基斯甸普列錫同羅夫度斯卓克,到柏度洛迪古斯、巴舒亞伊及艾斯派古達,都曾經攻入屈福特大門。

屈福特防線穿窿
排聯賽第4位嘅車路士於周中不敵韋斯咸,今場回師史丹福橋球場出擊,必以獅子搏兔姿態對付屈福特;基斯甸普列錫狀態大勇,相信可以繼首循環後再度取得入球。不過,「車仔」後防於復賽後亦非毫無破綻,面對同屬護級分子嘅阿士東維拉都失波,加上近7次對屈福特只有1次保持不失,全開3球或以上,今場絕對係一場入球盛宴,誠意推介入球大。邪神

李斯特城啞火捱細界
李斯特城愈踢愈沉,暫時坐住嘅3哥位愈嚟愈唔穩陣,今晚佢哋將會對另一支啞火嘅球隊水晶宮,預料今戰將會係悶戰一場,推介中位數2.5球入球細。

(Now 622周六晚10時直播)

「狐狸」李斯特城聯賽重開後,4戰包括聯賽對屈福特、白禮頓、愛華頓,以及英足盃對車路士,合共只入2球,同以往不俗嘅火力形成強烈對比;前鋒占美華迪雖然係聯賽頭號射手,但佢急於射入聯賽第100球,反而陷入咗入球荒,連信心都冇埋,今場就算有主場之利,但要攻破以守代攻嘅水晶宮亦唔容易。

水晶宮踢風流波
另一邊廂,水晶宮喺英超重開首戰擊敗般尼茅夫後,分數已經超越英超傳統護級保險線,目前排聯賽第12位,可以踢風流波,水晶宮近2戰分別對利物浦及般尼都輸波兼0入球,明顯見到佢哋已經放軟手腳,今場對住有卡斯柏舒米高把關嘅「狐狸」更難入波,既然李斯特城近7場聯賽5次總入球都開出2球或以下,入球細係最佳選擇。法達斯維