日職復賽群雄磨定刀

2020-07-03 10:31:02 来源:网络

只踢罷首輪、因疫情停擺4個月嘅日職落實本周六重開,上季半爆冷相隔15年重奪聯賽冠軍嘅橫濱水手,今季揭幕戰主場面對大阪飛腳即輸波,衞冕之路慘食悶棍,貴為上季盟主,水手今季難免成為眾矢之的,而且之後亞冠盃分組賽重開,水手冇大事增兵下,能否兼顧多線作戰成為最大關鍵。星味十足嘅神戶勝利船仍由「小白」恩尼斯達擔大旗,呢支「日職銀河鑑隊」連奪上屆日皇盃及季前嘅日超盃,野心勃勃,如能保持穩定性勢必成為爭標熱門之一。

至於傳統勁旅廣島三箭及川崎前鋒,因為今季無緣亞冠盃,變相可以專心聯賽,其中廣島三箭首戰以3比0大破鹿島鹿角,盡顯爭標本錢,加上去季臨尾香嘅FC東京亦決心捲土重來,今季爭標形勢肯定比上季更為激烈。

神戶勝利船Vs廣島三箭 三箭鑿沉勝利船
日職最具星味嘅球隊神戶勝利船,將於主場迎戰廣島三箭,勝利船上季有「VIP 3巨頭」壓陣下只排第8位,普多斯基同韋拿今季已離隊,仍有恩尼斯達、華美倫、沙治森柏等球星效力,個人質素毋庸置疑,只嫌整體合作有待加強。勝利船季前簽入巴西前鋒戴恩費斯杜格拉斯,呢位32歲射手5年前喺三箭成名,三箭對佢踢法必定瞭如指掌,今場要倒戈建功自然難度更高。

近6次交手未輸過
三箭上季排日職第6位,34場聯賽只失29球,與FC東京並列上季失波第2少嘅球隊,佢哋今季開鑼戰以3球大勝鹿島鹿角,攻守有道,復賽前熱身賽中場川邊駿、新加盟嘅射手永井龍都勁弗,加上佢哋近6次對勝利船取得4勝2和,今場受讓值得支持。

(有線661及601台周六晚6時30分直播)

清水心跳Vs名古屋鯨魚 清水增兵劏鯨魚
首戰失利嘅清水心跳,將於主場迎戰飽受疫情困擾嘅名古屋鯨魚。上季聯賽排第12位嘅心跳今季銳意增兵,簽入巴西門將尼圖禾比、巴西後衞華爾度,以及泰國前鋒鄧達,聯賽首仗對爭霸勁旅FC東京雖以1比3敗陣,但新援鄧達攻入1球,反映球隊表現有所進步,中場石毛秀樹養傷兩個月都唔會構成影響。

祖奧離隊返巴甲
由於年屆33歲嘅巴西貴價前鋒祖奧,已經重投巴甲哥連泰斯,今季新加盟鯨魚嘅日本中場阿部浩之,雖於首場聯賽亦有士哥,初步表現對辦,不過由鳥棲砂岩借用、前日本國腳金崎夢生及澳洲門將蘭格歷克於6月初先後確診新冠肺炎,恐對球隊帶來負面影響,加上心跳近4次聯賽對鯨魚錄得全勝,明顯格食格,作客嘅鯨魚相信凶多吉少。

(有線664及604台周六下午5時直播)

大阪飛腳Vs大阪櫻花 飛腳打吡勝率高
日職周六重開即上演「大阪府打吡戰」,大阪飛腳主場迎戰大阪櫻花。兩軍今季首仗齊齊贏波,櫻花今季新簽入嘅巴西前鋒般奴文迪斯首仗即有士哥,初步睇冇入錯貨,而且巴西中場盧卡斯明尼路及澳洲前鋒皮雅斯禾寧都係新兵,陣容頗有新鮮感,唯一擔心係新球員較多,必須花時間重新適應,建立默契。飛腳聯賽首仗作客擊敗上屆盟主橫濱水手,表現予人驚喜,反觀櫻花首仗所贏對手只係大分三神,相比下飛腳嘅勝仗來得較有說服力。

主場勝率冠日職
翻查近年交手成績,飛腳近4次主場出戰打吡戰贏晒,而且根據J聯賽剛公布嘅嘅「21世紀日職最多勝仗」統計榜,飛腳自2001年起597戰贏287場,勝率達48.1%,排喺鹿島鹿角、川崎前鋒之後列第3位,遠勝宿敵櫻花嘅37.4%,今場可再追主勝。

(有線661及601台周六下午5時直播)

浦和紅鑽Vs橫濱水手 水手質優碎紅鑽
上屆盟主橫濱水手將會作客鬥浦和紅鑽。水手聯賽首仗出閘脫腳,以1比2不敵大阪飛腳,不過當時佢哋已經先後出戰日超盃及兩場亞冠盃分組賽,征戰連場難免有疲態,如今經過停擺期調整,養精蓄銳相信可以展現王者本色,但係南韓門將朴一圭近日右手骨折,至少休戰兩個月,令防線潛藏隱憂。

陣容老化未解決

紅鑽係昔日勁旅,近年成績下滑,上季位居聯賽14位令人失望,雖然連日聯盃在內,佢哋開季兩連勝,但2場波加埋失4球,防線問題仍係一大隱憂,即使簽入巴西前鋒李安納度拿斯文圖及澳洲後衞湯馬士丹治,可惜球隊老化問題未見解決。雙方後防各有不足,但水手實力始終凌駕紅鑽,加上近6次聯賽交鋒水手贏5次,客勝穩開。

(有線662及602台周六晚6時直播)