華迪爭入100球李城搶W送禮

2020-06-23 09:47:53 来源:网络

今晚英超早場有李斯特城鬥白禮頓,李城復賽首戰臨尾畀屈福特逼和極唔抵,今仗返主場作戰,「華Dee」占美華迪要爭取個人英超第100球,肯定搏老命;白禮頓上場反勝阿仙奴,只因「兵工廠」表現差,「狐狸」近5次交手贏4次,必捧主勝。

(Now 621周三凌晨1時直播)

李斯特城同白禮頓復賽後首場賽事,同樣喺補時有球隊入波,不過李城係受害者,被屈福特追和1比1,相反白禮頓就係得益者,入波反勝阿仙奴2比1。兩軍首戰後聯賽位置冇變,李城堅守第3位,白禮頓仍然排15,但下面5隊全失分,變相護級壓力稍為減輕。

白禮頓輸往績
於聯賽射手榜領先嘅占美華迪,有望取得個人英超第100球,領隊羅渣士相信會為佢提供機會,上場後備上陣嘅伊恩拿祖及迪馬雷格雷將會復任正選,此外,西班牙前鋒艾約斯佩雷斯亦可以候命,中前場有足夠調配。

白禮頓上仗有澳洲中場阿倫穆爾傷出,今場肯定缺陣,佢哋對住李斯特城一向捱打,近5次交手只得1和4負,真係未踢已經投降,加上「華Dee」專門喺佢哋身上搵食,最近4次對「海鷗」,占美華迪都有波入,今場主勝真係送畀你。