華拿就住踢多蒙特讓球勝抵錫

2020-06-20 10:11:49 来源:网络

德甲今晚進入倒數2輪賽事,9場聯賽同時間開波,而焦點戰係3哥RB萊比錫主場鬥2哥多蒙特。萊比錫周中快車和波後,首席射手迪姆華拿即宣布過檔車路士,餘下賽事隨時揸流攤,加上最近4次聯賽鬥「蜜蜂兵團」都未贏過,1.6倍讓球客勝好路。

(無綫85台、Now 671、有線652及612台周六晚9時30分直播)

萊比錫周中快車打和杜塞爾多夫2比2後,領先第5位嘅慕遜加柏4分,仍未確保來屆歐聯參賽資格,佢哋喺聯賽重開後主場未贏過,4場都和波收場。首席射手迪姆華拿復賽後7場聯賽4次食白果,狀態麻麻,呢位德國國腳日前落實下季轉投車仔,踢晒餘下德甲賽事,就會飛赴倫敦向新東家報到,連8月重開嘅歐聯8強將唔會為萊比錫披甲,為免有乜依郁受傷,引致轉戰英超受影響,今仗隨時就住嚟踢。

蜜蜂兵團近4對賽不敗
多蒙特已穩奪歐聯入場券,周中主場以0比2輸畀緬恩斯,雖然失威,但有指緬恩斯過往貢獻過高普、杜曹兩大主帥畀「蜜蜂兵團」,如今身陷降班威脅,多蒙特有「報恩」之嫌。查實多蒙特近5場聯賽作客贏晒,攻入13球僅失2球,表現非常穩定,加上近4次聯賽鬥萊比錫2勝2和,明顯格食格,面對主場跌Watt嘅萊比錫,至少保住唔輸,難得受讓必捧讓球客勝。