特雷斯登硬淨博半和

2020-06-03 07:46:27 来源:网络

德乙周中有補賽,漢諾威主場鬥特雷斯登。特雷斯登因有球員感染新冠肺炎要延遲復賽,嚟緊賽程會比其他隊伍緊密,球員狀態未起,作客亦難以搶攻。漢諾威上場作客1比3不敵辛特侯遜,復賽後首度輸波,為免連敗今仗料會踢得更謹慎,半場和好路。

(周四凌晨零時30分開賽)

漢諾威復賽後表現平平
漢諾威復賽後3場聯賽勝和負各一,狀態未算突出,球隊目前以36分排第11位,領先尾3嘅卡爾斯魯厄6分,仍然有降班危機,但形勢上唔算好危急,佢哋每場波只要步步為營,每1分穩陣咁賺番嚟就得。事實上,漢諾威亦深知聯賽榜形勢,德乙重開後亦一改搶攻戰術,連續3場皆開半場和,預計今場即使對包尾嘅特雷斯登,仍然唔會過分冒進。

特雷斯登由於早前有球員中招,上周末不敵史特加0比2場波,先至係球隊停擺後首場比賽,狀態有待提升。特雷斯登目前於聯賽榜雖然只得24分排包尾,不過佢哋只係踢咗26輪,比其他競爭對手少踢3場,護級仍未絕望。特雷斯登聯賽停擺前3場作客未輸過,而且全部開出半場和,比賽初段唔會咁易失波,頗為硬淨,半場和值得再追。