波圖出擊搶開讓客

2020-06-03 07:44:26 来源:网络

葡超今晚開波咪錯過!
停擺多時嘅葡超,今晚終於重開,仲有榜首波圖壓軸出場,喺尾場作客法馬利卡奧。波圖依家只係領先「2哥」賓菲加1分,稍一不慎隨時被過頭,重開首擊造訪虛火已過嘅奇兵法馬利卡奧,絕對唔會手軟,直取讓球客勝。

(周四凌晨4時15分開賽,馬會網上文字直播)

原本一直畀賓菲加騎住嘅波圖,趁住對手喺停擺前5場聯賽只得1勝下,從後趕上,以1分反壓賓菲加升上榜首,目前掌握爭標主動權,只要餘下賽程保持全勝即可捧盃,戰意爆燈。睇番波圖今季聯賽作客成績,除咗季初輸畀基維辛迪外,近11場錄得9勝2和佳績,當中近4場贏晒之餘,有3場至少贏兩粒,客場戰績僅次死對頭賓菲加,位居葡超第2佳,等閒球隊難阻佢哋。

事實上波圖攻擊力強勁,而且多點開花,陣中有14名球員於今季聯賽都有入球進帳,當中前線組合法蘭斯高蘇亞里斯及馬利加合共攻入13球,更可怕係波圖後衞阿歷士迪尼斯,呢位巴西守將至今已經有8個聯賽入球。波圖餓波一輪空群出擊,相信法馬利卡奧防不勝防。

法馬利卡奧跌晒Watt
法馬利卡奧雖然只係升班球隊,不過季初表現一鳴驚人,頭7仗取得6勝1和,更一度進佔聯賽榜榜首位置,主場成績亦相當不俗,聯賽12戰只曾3敗,主場威力不容忽視。不過,呢類奇兵通常都打道氣,踏入季中道氣洩咗,兼且畀列強摸清實力底細,戰績隨之下滑,停擺前8場聯賽,贏得1場咁大把,依家跌到落第7位,而且葡超重開後閉門舉行,法軍失去主場球迷聲勢,加上首循環碰頭慘吞3蛋,面對爭標心切嘅波圖,恐怕法馬利卡奧凶多吉少,讓球客勝咪錯過。