波圖賓菲加直路片到尾

2020-06-01 09:29:54 来源:网络

葡超周四凌晨返嚟啦!

歐洲各大聯賽陸續重開,今個周中輪到葡超返嚟喇!葡超嘅爭標形勢同近幾季冇乜分別,隨住「Big 4」其餘兩隊布拉加及士砵亭甩轆,今季嘅劇本都係熟口熟面,依然係由「1哥」波圖同「2哥」賓菲加兩大死敵爭逐冠軍,雙方只差1分,依家剩番10輪賽事,激烈到爆,未去到轉彎入直路,真係唔知鹿死誰手。

.雙殺死敵波圖衝冠佔先機.  

雖然賓菲加、波圖、士砵亭及布拉加被稱為葡超「Big 4」,實際上後兩者始終都爭啲霸氣難成氣候,因此近17季葡超冠軍,全由波圖同賓菲加包辦晒,其中波圖佔咗10次,稍勝一籌。

   

波圖去夏仍奉行一貫低買高賣嘅政策,將艾達米列達奧高價賣畀皇馬,所以開咧後的確唔及賓菲加咁穩定,不過隨住喺歐聯同歐霸相繼出局,令佢哋更加專注爭聯賽,除咗左閘阿歷士迪尼斯意外地省入8粒,成為陣中首席射手外,中場捷西斯哥朗拿更交出7個助攻,趁住賓菲加喺2月突然跌Watt,得以乘虛而入,以1分之差爬頭上榜首,可見佢哋喺停擺前狀態更勝死對頭。

兩大「硬嘢」或成攔路虎  

雖然賓菲加係聯賽入波最多、失波最少嘅球隊,但波圖手握一大優勢,就係佢哋今季聯賽兩循環「雙殺」賓菲加,由於葡超規定,若果同分係先計有關隊伍對賽得分,因此波圖亦佔咗先機。不過波圖亦有隱憂,喺餘下賽程唔及賓菲加咁輕鬆,仲會遇上硬嘢布拉加及士砵亭,難保後兩者忽然變身攔路虎,稍有閃失,足以影響波圖重奪聯賽冠軍。

.停擺回氣賓菲加追分場場搏.  

儘管過去17季葡超冠軍,賓菲加比波圖少3次,但若果單計6季,「里斯本雄鷹」5度封王,論近年勢頭遠勝波圖。賓菲加今季開咧後亦順風順水,頭19輪聯賽豪取18勝1負,氣勢如虹,點知喺2月突然大走樣,先喺次循環對壘再輸畀波圖,之後4場只得1勝2和1負,令佢哋停擺前畀波圖以1分反壓而屈居次席,兼且兩循環都不敵波圖,爭標形勢急轉直下。    

賓菲加前線嘅卡路士雲尼斯奧斯及碧斯,合共為球隊攻入29粒,位居射手榜頭兩位,難怪賓菲加以52球斬獲冠絕葡超,由魯賓戴亞斯與阿歷士基莫度領導嘅防線,24仗聯賽只失14粒,成為聯賽失球最少球隊。

誓重演去季後上封王  

由於賓菲加喺對賽方面不及波圖,惟有先做好本分,場場都要當決賽咁踢,1分都不能少,再望波圖失分,睇番賓菲加餘下賽程都較易踢,直至煞科戰先有「里斯本打吡」硬撼士砵亭,查實佢哋上季都靠凌厲後勁,贏晒最後9場聯賽,得以壓過波圖封王,難得喺停擺期間回一回氣,賓菲加可以重整旗鼓,只要重演上季季尾嘅瘋狂衝刺,話唔定會再創奇迹。