柏達邦鬥多蒙特大騷娛賓

2020-05-31 11:26:01 来源:网络

主場遇強慣咗搶攻
今晚德甲壓軸大戰,柏達邦主場鬥多蒙特。多蒙特上場對拜仁嘅榜首大戰全失3分,爭冠機會大打折扣,不過為保歐聯入場券,球員冇時間「哭波喪」,必須化悲憤為力量求搶3分;柏達邦今季鬥前列球隊踢法開放,經常合演入球騷,中位數3.5球入球大捧得過。(Now 670、有線651及611台周一凌晨零時直播)

多蒙特上場「國家打吡」以0比1不敵拜仁,未計尋晚成績已被甩開至7分,爭標機會相當渺茫,不過「蜜蜂兵團」目前比第5位嘅慕遜加柏僅多4分,來屆歐聯參賽資格仲未穩陣,現階段失分空間唔算多,必須重新振作力求反彈。

夏蘭特缺陣影響微
多蒙特上場輸波之餘,更有王牌中鋒艾寧夏蘭特及中場達侯特傷出,今場肯定缺陣,好彩查頓辛祖、杜根夏薩特及祖利安白蘭特近期都有上佳演出,加埋出擊兩閘阿舒拉夫及拉菲爾古里路頻頻有斬獲,夏蘭特缺陣對整體進攻料影響不大,反而達侯特倦勤,或會削弱中場截擊力,事關韋素、安利簡恩雖已傷愈,仍嫌狀態未足,隨時令防線壓力大增,增加失波危機。

現排包尾嘅柏達邦重開後表現平穩,連續3場聯賽打和搶到分,不過未計尋晚成績,佢哋仲落後畀尾3嘅杜塞爾多夫8分,頻頻和波對護級幫助唔大。柏達邦今季聯賽6次鬥「前4」拜仁、多蒙特、利華古遜及RB萊比錫,雖然只得1和5負,但全部都有波入,加埋一共入12球,6次總入球都達5球或以上,面對強隊照樣鬥攻,有利出現入球騷,相信今場唔會例外,捧中位數3.5球大盤最好路。