漢堡遇恩物誓打翻身仗

2020-05-31 11:25:09 来源:网络

周日晚德乙上演頭尾大戰,漢堡主場鬥護級分子韋恩。復賽後仲未贏波嘅漢堡,爭勝欲望十足,加上主場表現不嬲醒過作客,面對近期兩連敗嘅韋恩,自然希望大勝一仗吐烏氣,讓球主勝咪錯過。(myTV SUPER周日晚7時30分直播)

韋恩兩大主力坐波監
矢志重返德甲嘅漢堡,復賽後遇上地獄賽程仲未開齋,頭兩場打和前列格雷特霍夫及「1哥」比勒費爾德,上仗作客「2哥」史特加,臨完場先畀對手攻入奠勝一球,搞到現時第3嘅位置唔穩陣,上季臨尾錯失重返德甲嘅傷痛記憶猶新,為免重蹈覆轍,必須盡快搵番條贏波方程式。好彩漢堡主場威力有返咁上下,今季13仗主場獲9勝,當中6次贏2球或以上,今晚面對實力次一皮嘅韋恩,值得睇高一線。

暫時位列尾二嘅韋恩護級形勢嚴峻,尤其搶分能力被人詬病。復賽後接連不敵海登咸同辛特侯遜,兩場波一球都入唔到,上仗中場杜比亞斯舒韋迪仲要兩黃一紅被逐離場,今場要同主力射手迪特根齊齊坐波監。韋恩今季28戰輸咗14場,仲多過榜尾特雷斯登,隨時成為漢堡出氣袋,一於捧讓球主勝。