慕遜加柏圖振雄風猛轟柏林聯

2020-05-31 11:24:00 来源:网络

德甲爭標形勢明朗化,但「前4」之爭依然激烈。慕遜加柏近兩場聯賽只拎得1分,爭奪歐聯資格受到重大打擊,今晚主場迎戰弱旅柏林聯,3分固然志在必得,更希望踢出漂亮勝仗振奮士氣,面對作客腳軟嘅柏林聯隨時大開殺戒,慕遜加柏上盤值得捧場。(Now 670、有線651及611台周日晚9時30分直播)

慕遜加柏今季以歐聯資格為目標,上星期主場喺過萬「膠板球迷」撐場下,以1比3不敵利華古遜,爭入「前4」受到重大挫折,及後作客雲達不來梅,亦只能悶和對手痛失2分。為免再令粉絲失望,今晚主場出擊必定求重振雄風。事實上,慕遜加柏上半季曾踢出主場8連勝強勢,當中狂轟25球,平均每場入超過3球,除5比1喪炒奧格斯堡盡顯強橫攻擊力外,連班霸拜仁慕尼黑亦曾向佢哋俯首稱臣,前鋒柏利亞同馬古斯杜林呢對法國組合,威力強勁兼默契十足,值得投以信心一票。

柏林聯作客腳軟
柏林聯目前位處聯賽榜下游,未計周日凌晨賽事領先尾3杜塞爾多夫4分,同降班區仲有些少距離,最大原因係佢哋主場成績唔曳。可惜柏林聯作客表現慘不忍睹,今季14場作客錄3勝2和9負,對上3場作客均以2球或以上差距落敗,包括上星期作客慘吞哈化柏林4蛋,今仗賽前更有前鋒普爾達因為唔肯減薪,被球會下「封殺令」,戰鬥力打折扣下,遇上雄心勃勃嘅慕遜加柏,好大機會再逢大敗。