江原難阻全北開W

2020-05-30 08:35:15 来源:网络

3年未踢過江陵主場
韓職開鑼3輪後只係得番一支長勝雄師,就係衞冕嘅全北汽車。呢支韓職盟主今日作客FC江原爭取4連勝,好大機會派出南非中鋒韋迪維積克正選掛帥,火力夠晒保證。江原近年面對全北都「冇啖好食」,格食格味道甚濃,「新主場」更加可能變成死穴,今仗可以放心捧客勝。

(無綫85台周六下午3時30分直播)

全北開季表現未見特別有霸氣,但控制賽事同埋技術、戰術能力都毋庸置疑,往往憑一擊就可置對手於死地。隨住南非星級前鋒韋迪維積克連續2場後備入替都有好表現,今場翼鋒趙圭成停賽,韋迪維積克料將正選掛帥,以其1米96嘅身高同衝撞能力,將可更有效發揮莫理斯4-1-4-1陣式嘅威力,配合埋擔正嘅老大哥李東國,全北整體表現勢必獲得提升。

射手休戰冇本錢偷雞
江原幾乎採用全本土班底出戰,唯一一位外援中里祟宏今季仍未有1分鐘嘅落場機會。事實上,江原今季整體演出的確不俗,但係論個人質素同戰鬥力,只係屬於韓職中游分子,同冠軍熱門全北仲有一定距離。況且江原今個球季起用春川松岩體育場、江陵綜合運動場兩地做主場,希望擴大地區影響,吸引更多球迷。今場江原唔使坐2小時10分鐘車「遠征」春川市,本來係件好事,但係佢哋已經3年冇喺江陵大本營踢過比賽,同作客差無幾,主場之利真係得個講字。

最重要係江原一向遇強即屈,近11次主場迎戰全北,只得1勝1和9負劣績,今場主力前鋒金承大又唔出得,想偷雞都冇本錢,齋靠死守好難抵擋來勢洶洶嘅全北,客勝必捧。