利華古遜大反擊

2020-05-29 09:44:10 来源:网络

客戰弗賴堡搶分踢歐聯
德甲今晚獨腳戲上演弗賴堡主場迎戰利華古遜,作客嘅利華周中慘敗畀禾夫斯堡,爭歐聯入場券又處於下風,好彩球隊炮台夠多,尤其新星夏維斯德甲重開後連續2仗作客梅開二度,有望極速反彈。弗賴堡入得又失得,仍有機會爭歐霸入場券,預計佢哋踢得開放會同利華鬥攻,今場2.5球入球大熱得嚟夠穩陣。

(Now 670、有線651及611台周六凌晨2時30分直播)

弗賴堡今季表現中規中矩,但仍然有機會爭一張歐霸入場券,球會上下應該非常滿意現時嘅聯賽位置,聯賽尚餘6輪已經取得38分,已經比上季及前季嘅36分為多,剩低幾場波可以放開懷抱享受賽事。

啱啱周中弗賴堡作客法蘭克福嘅德甲賽事,渡邊年都有睇,半夜三更有6個入波真係成個人醒晒,弗賴堡踢得夠晒性感,領先3比1畀人追番3比3,整場賽事雙方合共錄得44次射門,可想而知冇乜悶場。其實再對上一仗,弗賴堡對住雲達不來梅,球隊全場都有17次射門,雖然最終顆粒無收,更以0比1落敗,但可以睇得出,球隊中前場狀態唔差,今次主場出擊,入波決心就更加大。

利華近期作客入波多
利華古遜周中慘敗1比4畀禾夫斯堡,始終周中快車對球隊有一定考驗,幸好利華陣中有多名攻擊手,除咗新星夏維斯,教練保斯手上仍然可以有唔同中前場球員調動,相信對攻力唔會有太大影響。利華古遜現時聯賽形勢稍為被動,如果要爭歐聯入場券,剩番6輪已經不容再失,相信今場一樣以攻代守,佢哋作客踢法唔會有太大改變,近8場作客有7場總入球開出3球或以上,強烈推介今場中位數2.5球入球大。