奧斯納貝克雷根斯堡打崩頭

2020-05-29 09:43:11 来源:网络

周六凌晨德乙大戰,奧斯納貝克主場鬥雷根斯堡。奧斯納貝克周中雖然爆冷擊敗格雷特霍夫攞到護級寶貴3分,不過佢哋對上5場主場聯賽僅得1和4負,對住重開後未輸過嘅雷根斯堡冇本錢讓波,首選讓球客勝。

(on.cc東網周六凌晨零時30分直播)

今季升上德乙嘅奧斯納貝克自歇冬後未好過,上場作客2比0擊敗格雷特霍夫,係呢班波歇冬後10場聯賽首次贏波,依家佢哋排聯賽榜13位,比尾2嘅韋恩只多5分,仲要搶分護級。可惜係奧斯納貝克今季14場聯賽主場僅得5勝,勝出率不足4成,而且單計歇冬後5場主場聯賽只得1分,包括近2場以大比數不敵漢諾威及韋恩,加埋失10球,後防形同虛設,實在畀唔到人信心。何況進攻主力歷卡斯舒密特累積黃牌夠數,今仗需要坐波監,對球隊進攻亦有影響,要讓波真係危危乎。

雷堡夠韌受讓要得過
雷根斯堡停擺前6場聯賽輸5場,好彩經過休戰期,狀態明顯有改善,佢哋聯賽重開先後打和基爾、辛特侯遜及紐倫堡,當中2次喺先落後情況下成功搶分,表現夠韌力。睇番兩軍今季首循環交鋒踢成3比3,實力相差無幾,呢場雷根斯堡有得受讓,捧讓球客勝啱數。