奧格斯堡半和邦到手

2020-05-27 08:53:16 来源:网络

今晚德甲中下游對決,奧格斯堡主場迎戰柏達邦。雖然奧堡有新帥效應,上仗贏波反彈,不過包尾嘅柏達邦喺聯賽重開後連續兩仗打和,狀態唔曳,呢班波客場出擊初段例必死守,經常開半場和,不妨追多次。

(myTV SUPER周四凌晨2時30分直播)

奧堡新帥靴列治之前因違反隔離令出去買牙膏,搞到聯賽重開首仗對禾夫斯堡被罰停賽,球隊亦因此輸埋,直到上仗正式督師,作客史浩克04即豪贈3蛋,賽後喺社交平台仲寸爆史浩克04要改名做03,認真牙擦。

以波論波,奧堡上仗靠罰球早早開紀錄,中後段再趁對手壓前時兩度反擊得手,戰術無疑成功,但更大原因係史浩克狀態太曳,重開後兩連敗狂吞7蛋,咪因為大勝一場而將奧堡睇得太高。

柏達邦放開懷抱有好轉
老實講柏達邦喺德甲確係唔夠班,長期排包尾,未計今輪,依家落後尾3嘅杜塞爾多夫6分,就算想爭踢護級附加賽亦唔易。但冇乜包袱下,柏達邦近期表現反而有好轉,重開兩輪接連打和杜塞爾多夫及賀芬咸,令人喜出望外。況且佢哋有自知之明,尤其係作客初段定必死守,近7仗聯賽作客6次開半場和,包括造訪榜首拜仁半場都頂得住唔輸,今仗半場和值得再追。