萊比錫砌哈化大有睇頭

2020-05-27 08:51:49 来源:网络

迪姆華拿橫衝直撞
德甲今晚繼續開快車,兩支強橫火力球隊交鋒,RB萊比錫主場迎戰哈化柏林。萊比錫射手迪姆華拿上場大演帽子戲法,狀態弗到震;哈化「新帥效應」照耀下,表現亦脫胎換骨,兩連勝勁轟7球,加上雙方碰頭例演入球騷,近6次對賽有5次總入球達4球或以上,中位數3.5球嘅大盤值博!

(Now 670、有線651及611台周四凌晨零時30分直播)

「德甲狂牛」RB萊比錫喺德甲重開後首場,雖然僅逼和弗賴堡1比1,令人失望,但經過「熱身」後,一眾主力逐漸上力,上場作客大炒緬恩斯5比0,大紅人迪姆華拿怒轟3球,亦係佢今季第3次上演帽子戲法,將累積入球增加至24球,繼續力追拜仁神鋒羅拔利雲杜夫斯基。

仲有一點值得留意,就係迪姆華拿堪稱哈化柏林嘅剋星,佢近4次鬥哈化有5球進帳,今場隨時又有「士哥」。事實上,RB萊比錫正為力爭聯賽前4位,奪取下屆歐聯入場券而努力,絕對1分都不能少。以RB萊比錫近4次對哈化,取得全勝兼轟入18球嘅走勢,預料今場會繼續狂攻對手。

新帥效應哈化乘勇鬥攻
另一邊廂,哈化柏林4月初宣布聘請拉巴迪亞執教,呢位前禾夫斯堡主帥的確有料到,迅速令球隊翻生,先喺德甲重開首場以3比0大勝賀芬咸,上場「打吡戰」再豪派柏林聯4隻光蛋,陣中兩位前鋒伊比斯域及馬菲奧斯根夏連續兩場都有波入,力足撕破RB萊比錫防線。喺「新帥效應」下,哈化柏林球員狀態及信心無疑處於高位,勢必乘勝追擊,作客照同RB萊比錫鬥攻,球迷坐定定等睇入球騷。