法蘭克福慌失失捱細界

2020-05-26 10:04:49 来源:网络

近況曳爆嘅法蘭克福,今晚德甲喺主場迎戰弗賴堡。法福於聯賽5連敗,仲有射手柏辛斯亞未好番,狀態差到冇朋友,就算有地利都會先做好防守,弗賴堡又作客唔掂,何況近年碰頭旺少交收,2.5球嘅細盤更值博。(myTV SUPER、FOX+周三凌晨2時30分直播)

法福喺停擺後好似食咗豬油糕,狀態谷極都谷唔起,重開後兩仗輸晒兼狂失8粒,包括日前作客拜仁慘敗2比5,更出現中堅軒迪列加梅開二度再自擺老烏,成班波畀拜仁打到慌晒,連同停擺前在內,法蘭克福喺聯賽已連輸5場。最弊係陣中首席射手柏辛斯亞仍然有傷在身,今仗繼續缺陣,單靠另一前鋒安達施華數胡,恐怕獨力難支,好彩中場杜明歷克哥亞刑滿復出,有佢做掃蕩可減低防線嘅壓力。法福屢戰屢敗,當務之急係要先穩定軍心,必定做好防守止住跌勢。

弗賴堡作客唔識入波
弗賴堡雖然位處聯賽榜中游,但上仗爆冷喺主場輸畀尾2嘅雲達不來梅,多少都影響信心,而且佢哋客場戰績差勁,近11場聯賽作客贏得1場咁大把,今場唔敢輕舉妄動。兩軍近5次交手,有4次開2球或以下,預計大家都會穩陣行先,唔慌多波入,2.5球嘅入球細有逾2倍,值得捧場。