史浩克04執到堡

2020-05-24 08:39:23 来源:网络

打吡慘敗搵弱旅出氣
今晚德甲早場,中游分子史浩克04主場迎戰奧格斯堡。「礦工」上仗喺魯爾區打吡戰慘敗,只因對手實力太強,今戰對住實力差一截兼作客5連敗嘅奧格斯堡,絕對係終止聯賽8場不勝嘅最佳時機,1.92倍主勝有計。(Now 670、有線651及611台周日晚7時30分直播)

史浩克喺上周聯賽重開嘅魯爾區打吡,竟以0比4大敗畀死敵多蒙特,連盃賽在內,已經10場法定時間未贏過,戰績為5和5負,包括聯賽8場不勝,對上一場勝仗要數到1月歇冬後首仗主場2比0擊敗慕遜加柏。不過坦白講,上仗大敗,除咗史浩克未上力外,亦與多蒙特極速入局有關,吸取慘敗教訓後,今場一定知恥近乎勇,難得遇到弱旅奧格斯堡,「礦工」必趁機破不勝悶局。雙方首循環交手,史浩克04作客都贏3比2,返主場更有取勝把握。

奧格斯堡依家只徘徊中下游,比尾3嘅杜塞爾多夫僅多4分,有一定護級壓力。但佢哋近況實在太差,上周聯賽重開前,先鬧出新帥靴列治喺隔離期間違反禁令出去買牙膏,搞到主場對禾夫斯堡冇得督師,最終輸1比2之餘,全場都畀禾堡控制戰局,中前場個個冇料到,難怪近6場錄得1和5負,咁弱雞真係搶1分都難。

奧格斯堡作客5連敗
翻查紀錄,奧格斯堡作客表現堅曳,由去年底至今連續5場輸波,入得1球及共失14球,見到都唔開胃,而且有基爾化、西蒙艾斯達、安達夏恩及舒希巴因傷倦勤,要喺史浩克身上搶分,只得渺茫同冇機會,仲唔係天助「礦工」,主勝不容錯過。