緬恩斯細守萊比錫

2020-05-24 08:37:55 来源:网络

周日晚另一場德甲由緬恩斯主場鬥RB萊比錫;萊比錫上周重開首戰只能逼和弗賴堡,射手迪姆華拿忘帶射門鞋,令球隊入球數字大減;緬恩斯主場防守唔錯,而且首循環作客輸過0比8,今場肯定更加打醒十二分精神,中位數3.5球建議捧細。(Now 670、有線651及611台周日晚9時30分直播)

迪姆華拿啞火影響大
萊比錫上場聯賽主場喺落後1球情況下,只憑尤索夫保臣入波逼和弗賴堡1比1,由原本排第3、跌落今輪未開波前嘅第4位,經停擺後狀態明顯未上力,而且首席射手迪姆華拿近8場聯賽只入1球,嚴重影響球隊攻擊力,好彩佢哋防守總算交足功課,近6場聯賽有4場冇失波,5場總入球開3球或以下,未致於被前列球隊拋離。

緬恩斯上場作客科隆同樣先落後,最終連追2球搶番1分,韌力十足,佢哋對上3場主場聯賽未輸過,加埋只失1球,一心主守唔易咬得入佢哋。緬恩斯首循環作客萊比錫曾大敗0比8,今場當然唔想再衰多鋪,吸取上次教訓,預計今次會踢得更保守及小心,以萊比錫近期前線表現,勢難出現大量入波,捧3.5球細啱數。