慕遜加柏有利可屠

2020-05-23 09:08:52 来源:网络

雙箭搶韁嗒私房菜
今晚德甲前列大戰,「3哥」慕遜加柏主場對第5位嘅利華古遜。慕軍法國孖寶馬古斯杜林及柏利亞復賽後狀態大勇,加上近年碰頭食住利華古遜,保「前4」關鍵戰勢搶贏波3分,平手盤有買趁早!

(無綫85台、Now 671、有線652及612台周六晚9時30分直播)

上季歇冬後走晒樣嘅慕遜加柏,今季同樣喺歇冬後跌Watt,從冬季亞軍一度跌落第4位,但新冠肺炎疫情爆發令聯賽停擺,反而畀到佢哋時間喘息調整。慕軍上周聯賽重開作客法蘭克福,即如狼似虎,憑柏利亞開波35秒閃電入波,加埋馬古斯杜林打破自上年12月頭以來,連續12場聯賽嘅入球荒,輕鬆贏3比1升上「3哥」位,現時落後榜首拜仁6分,仲有機會爭標。

利華古遜搶攻易出事
查實利華古遜近況亦唔錯,聯賽重開首場作客大炒雲達不來梅4比1,20歲新星夏維斯更省兩粒,呢位德國國腳今年各項賽事,錄得9個士哥及7次助攻,協助球隊歇冬後聯賽豪取7勝1和1負,現時只落後「4哥」RB萊比錫1分,為爭下屆歐聯入場券,今場或會主動出擊。不過利華最大問題係攻強守弱,歇冬後9場聯賽只得3場冇失波,共失10球,連弱旅不來梅、柏達邦及柏林聯都搵到食,加上悍將拿斯賓達續抖,防守不穩難望改善。

慕遜加柏一向靠主場搵食,今季13場聯賽主場錄9勝2和2負,成績僅次於多蒙特及拜仁,唔講得笑。翻查紀錄,兩軍近4次碰頭,慕遜取得3勝1負,包括3次聯賽贏晒,擺明格食格喇,遇上以攻代守嘅利華,益晒慕遜打最擅長嘅反擊,主場仲唔使讓波,平手盤必捧慕軍。