哈化主場曳讓唔起細佬

2020-05-22 08:46:03 来源:网络

「柏林打吡」勢均力敵
今輪德甲由「柏林打吡」打頭陣,哈化柏林主場迎戰柏林聯,論名氣哈化佔優,但佢哋以往面對「細佬」柏林聯佔唔到優勢,雙方近5次交鋒,哈化只獲1勝2和2負,今場讓波制唔過,寧博柏林聯讓球客勝。(Now 671、FOX+、有線652及612台周六凌晨2時30分直播)

雖然哈化柏林喺上場德甲重開後,作客以3比0大勝賀芬咸,但要留意佢哋「反傳統」,今季主場成績遠不及作客,喺主場僅獲得12分,反而作客取得19分。再睇埋哈化柏林近6場聯賽主場都未贏過,只錄得3和3負,其中4場更加未能取得入球,今場可以話係「主場不利」,仲要讓球,未免太被高估。

柏林聯近2次作客交手1勝1和
哈化柏林今季已經三度換帥,上月先至由拉巴迪亞接手領軍,前鋒沙洛文卡勞早前因為喺社交網直播藐視防疫工作,因而受到處罰,可見成班波內部混亂,難免影響士氣。

另一邊廂,柏林聯上場0比2不敵勁旅拜仁慕尼黑,只因對手實力超班,實屬非戰之罪。佢哋嗰場表現唔算差,因被判罰12碼失守,先令形勢急轉直下。其實柏林聯面對實力接近嘅球隊,搶分機率幾高,近3場聯賽作客就贏過雲達不來梅及法蘭克福。加上同市球隊交鋒,雙方為面子都會特別落力,戰況往往會拉成均勢,捧受讓一方比較着數。既然柏林聯近2次作客哈化柏林獲得1勝1和,相信今場都有力再次全身而退,讓球客勝值博。