柏林聯鬥拜仁開大餐

2020-05-17 09:27:36 来源:网络

主場遇強照搶
今晚德甲榜首拜仁慕尼黑登場,作客鬥柏林聯。拜仁自換帥後重返正軌,不過作客經常有失波,遇上踢法進取嘅柏林聯未必可保持不失;柏林聯今季主場鬥前列球隊經常上演入球騷,捧中位數3.5球大盤最明智。

(Now 671、有線612及652台周一凌晨零時直播)

拜仁自從去年11月由漢斯弗利克接替尼高高華掌帥後,重拾班霸本色,除停擺前11場聯賽攞到10勝1和,歐聯16強首回合作客更以3比0大破車路士,加上德國盃殺入4強,目標直指3冠王。為穩定軍心,拜仁喺停擺期間先後同漢斯弗利克、湯馬士梅拿及新星艾方素戴維斯續約,同時提升U17教頭高路斯下季擔任助教,所以今次疫情對拜仁影響唔大。

羅拔仔傷愈候命
停擺前喺歐聯受傷嘅羅拔利雲度夫斯基經已傷愈,呢名拜仁神鋒今季聯賽轟入25球,比自己上季攞德甲神射手嘅22球仲多。不過拜仁季初之所以一度跌出聯賽榜三甲,同防線不穩有極大關係。今季佢哋12場作客聯賽失15球,場均失波多於1球,相信會以攻代守。

未計尋晚賽事,柏林聯暫排聯賽榜第11位,唔算失禮,首席前鋒施巴斯坦安達臣射術有番咁上下,而且柏林聯主場夠進取,今季12場聯賽主戰得2場食白果,其餘10戰加埋入咗18球,當中試過贏多蒙特及慕遜加柏,僅以2比3不敵利華古遜,面對強隊冇包袱一樣照攻。首循環碰頭拜仁主場亦只係險勝2比1,今晚作客讓二球略嫌過火,客W亦冇乜肉食,不如轉捧中位數3.5球嘅大盤。