波琴穩陣派半和啱數

2020-05-16 09:43:56 来源:网络

除德甲之外,德乙亦喺今晚重開,其中直播戲碼,由老牌球會波琴主場迎戰「4哥」海登咸。波琴只領先尾3嘅韋恩3分,要護級不容有失,佢哋向來穩陣行先,停擺前4場聯賽全部半場與對手打和,既然有得玩即場投注,開波前先揀半場和,睇定啲臨場捧埋波琴「下一隊入球」。

(on.cc東網周六晚7時直播)

波琴今季開咧頭5場只得2和3負,匆匆炒咗教練杜特,改由球隊名宿湯馬士雷斯執教,之後12場聯賽只輸2場,排名一度攀升至11位,可惜及後走勢又回落,好彩佢哋停擺前表現已經穩定落嚟,曾經擊敗特雷斯登、打和辛特侯遜及達斯泰特,即使對住「2哥」史特加,都頂到80分鐘先失守僅輸1粒。

波琴喺呢4場賽事全部同對手半場打和,當中3仗半場波膽為0比0,踢法相當穩陣。再者波琴現時只領先尾3嘅韋恩3分,護級大前提下1分都不能少,經歷停擺後,估計教練湯馬士雷斯會延續保守戰術,先守半場再伺機而行。

海登咸作客唔敢亂嚟
海登咸今季表現唔曳,依家以41分排第4,與次席史特加只差4分,仍有機會取得前2名嘅直接升班資格,不過佢哋面對波琴往績一般,12次交手只得4勝2和6負,加上停擺咁耐球員狀態未必操起,作客更加唔敢輕舉妄動,睇番海軍今季25場聯賽,亦有14場開半場和,不妨再追。值得留意波琴近3次主場對海登咸,全部先開紀錄,既然有直播大家大可睇住嚟玩,易邊後再追波琴「下一隊入球」,分分鐘有驚喜。