神經刀賀芬咸主場大盤王

2020-05-15 10:50:55 来源:网络

周六德甲有場賀芬咸主場鬥哈化柏林,賀芬咸可以講係德甲神經刀,主場贏過多蒙特、利華古遜等前列強豪,同時又可輸畀奧格斯堡、緬恩斯等護級球隊;哈化柏林停擺期間有護級專家拉巴迪亞上任,為打德甲保衞戰,首戰作客照搶。賀芬咸今季13場主場聯賽有11次開3球或以上,係德甲主場開大最多球隊,今場捧大最好路。

哈化搵護級專家打保衞戰
哈化柏林今季頭12輪聯賽只得11分,為拯救球隊上年底搵咗「奇哥」奇連士文出山執教,點知佢只係教咗10場波,就以不獲高層信任為由「劈炮」,搞到隊波失晒預算。哈化喺停擺前聯賽榜排第13位,排名仲低過新升班嘅同市球會柏林聯,面子盡失,而且只比尾3嘅杜塞爾多夫多6分,隨時捲入降班漩渦,為重振聲威,球會邀得拉巴迪亞接手;呢位護級專家之前曾經「拯救」漢堡及禾夫斯堡等球隊,今次嚟到哈化有望照辦煮碗。

賀芬咸停擺前各項賽事6場不勝,表現似走下坡,不過佢哋今季主場曾經贏過「2哥」多蒙特及利華古遜,腳風順起上嚟唔係人咁品,加上目前只比第6位嘅史浩克04少2分,有權問鼎來屆歐霸盃參賽資格,壓力相對冇咁大下,相信會繼續踢進攻足球。